காஸா போர்: மத்தியஸ்த முயற்சிகளைக் கைவிட கத்தார் முடிவு

காஸா போரை முடிவுக்குக் கொண்டுவருவதற்கான மத்தியஸ்த முயற்சிகளை தற்காலிகமாகக் கைவிட கத்தார் முடிவு செய்துள்ளது.

இது குறித்து அந்த நாட்டு அதிகாரிகள் சனிக்கிழமை கூறியதாவது:

காஸாவில் போர் நிறுத்தம் மேற்கொள்வதற்கான ஒப்பந்தத்தை எட்டுவதற்காக இஸ்ரேலுக்கும் ஹமாஸ் அமைப்புக்கும் இடையே தொடர்ந்து மத்தியஸ்தம் செய்து வைக்கப்படுகிறது.

ஆனால், இதற்கான பேச்சுவார்த்தையில் போர் நிறுத்த ஒப்பந்தத்தை அடைவதில் இரு தரப்பினருமே உறுதியான ஆர்வத்தை வெளிப்படுத்தவில்லை.

எனவே, இந்த மத்தியஸ்த முயற்சிகளை தற்காலிகமாகக் கைவிட முடிவு செய்துள்ளோம். இது தொடர்பாக இஸ்ரேல் அதிகாரிகளிடமும் ஹமாஸ் பிரதிநிதிகளிடமும் தெரிவிக்கப்பட்டுவிட்டது.

இந்த முடிவின் விளைவாக, கத்தாரில் ஹமாஸ் அமைப்பினரின் அலுவலகம் இனி தேவைப்படாது என்று அதிகாரிகள் கூறினர்.