உ.பி. அரசு மருத்துவமனை தீ விபத்து: தீவிர சிகிச்சையில் மேலும் 16 குழந்தைகள்

உத்தர பிரதேச மாநிலம், ஜான்சி அரசு மருத்துவக் கல்லூரி மருத்துவமனையில் குழந்தைகள் வார்டில் வெள்ளிக்கிழமை ஏற்பட்ட தீ விபத்தில் 10 குழந்தைகள் உயிரிழந்த நிலையில், காயமடைந்த மேலும் 16 குழந்தைகளுக்கு தீவிர சிகிச்சை அளிக்கப்பட்டு வருகிறது.

ஜான்சி மாவட்டத்தில் உள்ள மகாராணி லட்சுமி பாய் அரசு மருத்துவக் கல்லூரி மருத்துவமனையின் சிசு பராமரிப்பு பிரிவில் வெள்ளிக்கிழமை இரவு 10.45 மணியளவில் இந்த தீ விபத்து ஏற்பட்டது. மின் கசிவு காரணமாக தீ விபத்து ஏற்பட்டிருக்கலாம் என முதல்கட்ட விசாரணையில் தெரியவந்துள்ளது.

தீ விபத்து நிகழ்ந்தபோது மருத்துவமனையில் 52 முதல் 54 குழந்தைகள் சிகிச்சையில் இருந்தனர். இதில் 27 குழந்தைகள் பாதுகாப்பாக மீட்கப்பட்ட நிலையில், தீயில் கருகியும், புகை காரணமாக மூச்சுத் திணறல் ஏற்பட்டும் 10 குழந்தைகள் உயிரிழந்தனர். கரும் புகையால் பாதிக்கப்பட்ட மேலும் 16 குழந்தைகளுக்கு தொடர் சிகிச்சை அளிக்கப்பட்டு வருகிறது.

விபத்தில் உயிரிழந்த குழந்தைகளின் குடும்பத்துக்கு மாநில அரசு இழப்பீடு அறிவித்துள்ளது. இது குறித்து மாநில அரசு சனிக்கிழமை வெளியிட்ட செய்திக்குறிப்பில், 'விபத்தில் உயிரிழந்த 10 குழந்தைகளின் குடும்பத்தினருக்கு தலா ரூ. 5 லட்சம் இழப்பீடு வழங்க முதல்வர் யோகி ஆதித்யநாத் உத்தரவிட்டுள்ளார். விபத்தில் காயமடைந்து சிகிச்சை பெற்று வரும் குழந்தைகளின் குடும்பத்துக்கு தலா ரூ. 50,000 நிவாரணம் வழங்கவும் உத்தரவிட்டுள்ளார்' என தெரிவிக்கப்பட்டுள்ளது.