2,553 மருத்துவர் பணியிடங்களை நிரப்ப முன்கூட்டியே தேர்வு

அமைச்சர் மா.சுப்பிரமணியன்

சென்னை, நவ.29: அரசு மருத்துவமனைகளில் காலியாக உள்ள 2,553 மருத்துவர் பணியிடங்களை நிரப்புவதற்கான தேர்வை முன்கூட்டியே நடத்த முடிவு செய்யப்பட்டுள்ளதாக மக்கள் நல்வாழ்வுத் துறை அமைச்சர் மா.சுப்பிரமணியன் தெரிவித்தார்.

இதுதொடர்பாக சென்னை தலைமைச் செயலகத்தில் அவர் செய்தியாளர்களிடம் வெள்ளிக்கிழமை கூறியதாவது:

அரசு மருத்துவமனைகளில் காலியாக உள்ள 2,553 மருத்துவர் இடங்களுக்கு 23,917 பேர் விண்ணப்பித்துள்ளனர். அவர்கள் அனைவருக்கும் ஜனவரி 27-ஆம் தேதி இணையவழியே தேர்வு நடத்த திட்டமிடப்பட்டிருந்தது. தற்போது முதல்வர் அறிவுறுத்தலின்படி அந்த தேர்வை முன்கூட்டியே ஜனவரி 5-ஆம் தேதி நடத்த முடிவு செய்யப்பட்டுள்ளது. அதன்படி தேர்வுகள் நடத்தப்பட்டு விரைவில் பணி நியமனம் நடைபெறும்.