அரசு அறிக்கை மீது உயர்நீதிமன்றம் அதிருப்தி

யானைகள் வழித்தடத்தில் மணல் அள்ளப்பட்ட விவகாரம்

கோவையில் யானைகள் வழித்தடத்தில் சட்டவிரோதமாக மண் அள்ளப்பட்டது தொடர்பான அரசின் அறிக்கைக்கு சென்னை உயர் நீதிமன்ற நீதிபதிகள் அதிருப்தியை வெளிப்படுத்தினர்.

மேலும், யானைகள் வழித்தடத்தில் அதிகளவில் மண் அள்ள அனுமதி வழங்கியது யார்? அந்த மண் எங்கே, யாருக்காக கொண்டு செல்லப்பட்டது? என்றும் நீதிபதிகள் சரமாரியாக கேள்விகளை எழுப்பினர்.

கோவை வனப்பகுதியில் யானைகள் வழித்தடத்தில் சட்டவிரோதமாக மண் அள்ளப்படுவதாக புகார்கள் எழுந்தன. இது தொடர்பாக சென்னை உயர் நீதிமன்றத்தில் வழக்கு தொடரப்பட்டது. இந்த வழக்கை விசாரித்த உயர் நீதிமன்றம் சம்பந்தப்பட்ட பகுதிகளை நேரில் ஆய்வு செய்து அறிக்கை தாக்கல் செய்யும்படி கோவை மாவட்ட நிரந்தர லோக் அதாலத் தலைவருக்கு உத்தரவிட்டது. இதையடுத்து கோவை மாவட்ட நிரந்தர லோக் அதாலத் தலைவர் சென்னை உயர் நீதிமன்றத்தில் அறிக்கை தாக்கல் செய்தார்.