மழையும், மாறி வரும் தட்பவெப்பநிலையும்!

உள்கட்டமைப்பு வசதிகளை மேம்படுத்த நிறைய நிலங்கள் தேவைப்படுகின்றன. இந்த நோக்கத்திற்காக காடுகள் அழிக்கப்படுகின்றன. இதனால் காலநிலை மாறுபடுகிறது. விவசாயத்திற்குப் பெரும் நெருக்கடிகளை இந்தக் காலநிலை மாற்றம் ஏற்படுத்துகிறது.

- முன்னாள் அமைச்சர்

ரே நதிதான், எல்லா காலத்திலும் ஓடிக் கொண்டே இருக்கிறது. ஆனால், அதில் ஓடும் தண்ணீர்தான் ஒவ்வொரு காலத்திலும் வெவ்வேறாக இருக்கிறது. ஏனென்றால், தண்ணீர் ஒவ்வொரு பருவகாலத்திலும் அதற்கான வேகத்தோடு பெருகி ஓடுகிறது. இப்படி காலம் காலமாகத் தொடர்ந்து நடைபெற்றுக் கொண்டுதான் இருக்கிறது.

இருப்பினும் நதிநீர் பிரச்னைகள் இன்னும் இருந்து கொண்டுதான் இருக்கின்றன. அவ்வழக்குகள் நீதிமன்றத்தில் நிலுவையில் இருக்கின்றன. நீதிமன்றம் அதற்குத் தீர்வு தந்தாலும், அந்தத் தீர்வைப் பின்பற்ற சம்பந்தப்பட்ட மாநில அரசுகள் மறுத்து விடுகின்றன. வீணாகப் போகிற மழைநீர் வெள்ளமெனப் பாய்ந்தோடுவதைப் பார்த்தும், தண்ணீரின் அருமை தெரிந்த மக்கள் எல்லாவற்றையும் சகித்துக் கொண்டு வாழ பழகிக் கொண்டிருக்கிறார்கள்.

தற்போது ஃபென்சாய் புயலில் சிக்கித் தவித்தது தமிழகம். கடலூர், விழுப்புரம், திருவண்ணாமலை, சேலம், கிருஷ்ணகிரி வரைக்குமான அதன் பயணம் சென்னையையும் ஒரு உலுக்கு உலுக்கி விட்டுப் போயிருக்கிறது. விழுப்புரம் மற்றும் கடலூர் நகரங்களில் தென்பெண்ணை ஆற்றின் வெள்ள நீர் புகுந்ததால், குடியிருப்புப் பகுதிகள் முழுவதும் வெள்ளக்காடாகக் காட்சியளிக்கின்றன. வரலாறு காணாத மழை குறித்து வானிலை ஆய்வு மையம் எச்சரித்த போதும், முன் நடவடிக்கைகள் எடுப்பதில் தவறி விட்டது, தமிழக அரசு. தலைநகரம் சென்னையில் பல்வேறு பகுதிகள் வெள்ளக்காடாகக் காட்சியளித்தன. மின்தடையாலும், தண்ணீர் தேங்கி வழிந்தோடுவதற்கான வழி இன்றி தண்ணீர் அங்கும் இங்கும் அலைமோதியதாலும் சென்னை மக்கள் தத்தளித்துக் கொண்டிருந்தார்கள்.

கிழக்கு கடற்கரைச்சாலை, மாமல்லபுரம் பகுதிகளில் சூறாவளி காற்று வீசி நம்மை உலுக்கி விட்டுத்தான் சென்றது. கனமழை பெய்தபோதும், எந்தத் தேசிய பேரிடர் மீட்புக்குழுவோ, அரசு அதிகாரியோ அங்கு வரவில்லை. நிவாரண உதவிகள் அளிக்கப்படவில்லை. மீனவர்கள் ஒரு வாரமாக மீன்பிடிக்கச் செல்லவில்லை. 'எங்கள் வாழ்வாதாரம் பாதித்துள்ளது' என்று மாமல்லபுரத்தைச் சேர்ந்த மீனவர் ஒருவர் குற்றம் சாட்டினார். 'பதினைந்து நாட்கள் கூட மழை பெய்திருக்கிறது. ஆனால், இப்படி நடந்ததில்லை' என்று திருவண்ணாமலை மண் சரிவு குறித்து மக்கள் பதற்றப்படுகிறார்கள். மண் சரிவில் சிக்கி ஏழு பேர் மாண்டு போனார்கள்.