ஈவிகேஎஸ் இளங்கோவன் காலமானார்

சென்னை, ஈரோடு, டிச. 14: தமிழக காங்கிரஸ் முன்னாள் தலைவரும், ஈரோடு கிழக்கு தொகுதி எம்எல்ஏவுமான ஈவிகேஎஸ் இளங்கோவன் (76) சென்னையில் சனிக்கிழமை காலமானார்.

அவரது உடல் ஞாயிற்றுக்கிழமை (டிச.15) தகனம் செய்யப்படவுள்ளது.

உடல் நலக்குறைவு காரணமாக சென்னை மியாட் மருத்துவமனையில் இளங்கோவன் அனுமதிக்கப்பட்டிருந்தார். உடல் நிலையில் ஏற்பட்ட திடீர் பின்னடைவு காரணமாக சனிக்கிழமை காலை காலமானார்.

இதுகுறித்து, மியாட் மருத்துவமனையின் நிர்வாக இயக்குநர் பிரித்வி மோகன்தாஸ் வெளியிட்ட செய்திக் குறிப்பில், ஈவிகேஎஸ் இளங்கோவன் கடந்த நவ. 13-ஆம் தேதி மருத்துவமனையில் அனுமதிக்கப்பட்டார். மருத்துவர்கள் எவ்வளவோ முயற்சி செய்த போதிலும் அவர் உடல்நலம் தேறாத நிலையில் சனிக்கிழமை (டிச.14) காலமானார் என்று மருத்துவர்கள் தெரிவித்தனர்.

அஞ்சலி: இளங்கோவனின் உடல் பொது மக்களின் அஞ்சலிக்காக சென்னை மணப்பாக்கத்தில் உள்ள அவரது வீட்டில் வைக்கப்பட்டுள்ளது. இளங்கோவனின் மறைவுக்கு அரசியல் கட்சிகளின் தலைவர்கள் இரங்கல் தெரிவித்துள்ளனர்.