தென் கொரிய அதிபர் இடைநீக்கம்

பதவி நீக்கத் தீர்மானம் எதிரொலி

சியோல், டிச. 14: அவசரநிலை அறிவிப்பு விவகாரத்தில் தென் கொரிய அதிபர் யூன் சுக் இயோலை பதவி நீக்கம் செய்து அந்த நாட்டு நாடாளுமன்றம் சனிக்கிழமை தீர்மானம் நிறைவேற்றியது. அதையடுத்து அவர் உடனடியாக இடைநீக்கம் செய்யப்பட்டார். அவருக்குப் பதிலாக இடைக்கால அதிபராக பிரதமர் ஹன் டக்-சூ நியமிக்கப்பட்டார். கடந்த 2022-ஆம் ஆண்டு அதிபராகப் பொறுப்பேற்ற யூன் சுக் இயோலுக்கும் நாடாளுமன்றத்தில் பெரும்பான்மை வகிக்கும் எதிர்க்கட்சியான ஜனநாயகக் கட்சிக்கும் இடையே பல்வேறு விவகாரங்களில் கருத்துவேறுபாடுகள் நீடித்து வந்தன.

இந்தச் சூழலில், வட கொரியாவுக்கு ஆதரவாக எதிர்க்கட்சிகள் செயல்படுவதாகக் கூறி நாட்டில் அவசரநிலை ராணுவச் சட்டத்தை அமல்படுத்துவதாக யூன் சுக் இயோல் கடந்த 3-ஆம் தேதி திடீரென அறிவித்தார். அதற்கு நாடு முழுவதும் மிகக் கடுமையான எதிர்ப்பு எழுந்தது.