மருத்துவர் பற்றாக்குறை... பாதிப்பு மக்களுக்கு!

தமிழ்நாடு அரசு மருத்துவமனைகளில் மகப்பேறு-மகளிர் நலச் சிறப்பு மருத்துவர்களின் பற்றாக்குறையால், பணியில் இருக்கும் மருத்துவர்கள் ஓய்வின்றி 24 மணி நேரமும் பணியில் இருக்க வேண்டிய கட்டாயத்துக்குத் தள்ளப்பட்டிருப்பது கவலையளிக்கிறது.

- ஐவி.நாகராஜன்

சில நேரம் வாரத்தில் இரண்டு, மூன்று நாட்கள் கூடத் தொடர்ந்து பணியில் இருக்கும் சூழலும் அமைந்துவிடுவதாக மருத்துவர்கள் தெரிவிக்கின்றனர். இது மருத்துவர்களை மட்டுமல்லாமல், சிகிச்சை பெறுவோரையும் பாதிக்கிறது. ஓய்வே இல்லாமல் மருத்துவர்கள் பணியாற்றும் சூழல் இருப்பது அவர்களது பணி உரிமைகளுக்கு எதிரானது.

மருத்துவர்கள் ஒரு வாரத்துக்கு 48 மணி நேரம்தான் பணியாற்ற வேண்டும் என்பது சட்டம். நெருக்கடி நிலையிலோ, தவிர்க்க முடியாத அசாதாரணச் சூழலிலோ சிலர் கூடுதல் நேரம் பணியாற்ற நேரிடலாம். அப்படிப்பட்ட சூழல் கடந்த 2019 கரோனா காலத்தில் ஏற்பட்டது. இது தவிர்க்க இயலாத ஒன்று என்பதை மருத்துவர்கள் புரிந்து கொண்டு தங்களை அர்ப்பணித்துக் கொண்டனர். ஆனால், இன்றைய சூழலில் வரையறுக்கப்பட்ட பணி நேரத்தைவிட இரண்டு மடங்கு அதிகமாகப் பணியாற்றும் நிலை உள்ளது. கடந்த 10 ஆண்டுகளில் பலர் ஓய்வு பெற்று விலகியிருக்கிறார்கள் என்பதும் ஒரு உண்மையாகும். விருப்ப ஓய்வுத் திட்டம் இல்லாத நிலையில், பலருக்கு வேலையை விடுவதைத் தவிர வேறு வழியிருப்பதில்லை. அதேபோல் ஒரு மகப்பேறு மருத்துவர் மகப்பேறு விடுப்பில் சென்றால், அவரது இடத்தைப் பதிலீடு செய்வதற்கும் மருத்துவர்கள் இருப்பதில்லை.