200 இலக்கு: யாருக்கு சாத்தியம்?

தமிழக சட்டப்பேரவைக்கு 2026-இல் நடைபெறவுள்ள தேர்தலில் 200 தொகுதிகள் இலக்கை எந்தக் கூட்டணி எட்டும் என்ற விவாதம் பேசுபொருளாகியுள்ளது.

- பீ.ஜெபலின் ஜான்

2026 பேரவைத் தேர்தலுக்கு ஒன்றரை ஆண்டுகள் உள்ள நிலையில் ஆளும் திமுக, எதிர்க்கட்சியான அதிமுக, பாஜக ஆகியவற்றின் கூட்டணிக் கட்சிகள், நாம் தமிழர் கட்சி (நாதக), புதிதாக தொடங்கப்பட்ட நடிகர் விஜயின் தமிழக வெற்றிக் கழகம் (தவெக) ஆகியவை தீவிரமாக ஆயத்தமாகி வருகின்றன.

திமுக தலைவரும் முதல்வருமான மு.க.ஸ்டாலின், அதிமுக பொதுச் செயலர் எடப்பாடி கே.பழனிசாமி ஆகியோர் 200 தொகுதிகளில் வெற்றி பெறுவதே இலக்கு எனப் பகிரங்கமாக அறிவித்துள்ளனர்.

தமிழக தேர்தல் வரலாற்றில் இதுவரை திமுக, அதிமுக ஆகியவை தலா இரு முறை என நான்கு முறை மட்டுமே 200 தொகுதிகளைத் தாண்டி ஆட்சி அமைக்கும் வகையில் வெற்றி பெற்றன.

கருணாநிதி தலைமையிலான திமுக கூட்டணி 1971-இல் 205 தொகுதிகள், 1996-இல் 221 தொகுதிகள், ஜெயலலிதா தலைமையிலான அதிமுக கூட்டணி 1991-இல் 225 தொகுதிகள் மற்றும் 2011-இல் 203 தொகுதிகளில் வெற்றி பெற்றன.

இந்நிலையில், இந்த முறை 200 தொகுதிகள் இலக்கு என திமுகவும், அதிமுகவும் அறைகூவல் விடுத்துள்ளன. ஸ்டாலின் தலைமையிலான திமுக கூட்டணி 2019, 2021, 2024 என மூன்று பொதுத் தேர்தல்களில் தொடர்ந்து வெற்றி பெற்றுள்ளது. கருணாநிதி தலைமையிலான கூட்டணி இதுபோல மூன்று பொதுத் தேர்தல்களில் தொடர்ந்து வெற்றி பெற்றதில்லை.

எம்ஜிஆர், ஜெயலலிதா, கருணாநிதி போன்று அல்லாமல் மூன்று பொதுத் தேர்தல்களில் ஒரே கூட்டணியை உடையாமல் அரவணைத்துச் செல்லும் பெருமையை ஸ்டாலின் பெற்றுள்ளார் என்பது திமுக கூட்டணிக்கு மிகப் பெரிய பலம்.

கூட்டணி பலம், சிதறிக்கிடக்கும் எதிர்க்கட்சிகள், மகளிர் உரிமைத் தொகை போன்ற பாமர மக்களைக் கவரும் அரசின் திட்டங்கள் உள்ளிட்டவற்றின் நம்பிக்கையில் இந்த முறை 200 இலக்கு சாத்தியம் என்பது முதல்வர் ஸ்டாலினின் கணக்கு.