உள்கட்சி பிரச்னைகளை பேசி தீர்த்துக் கொள்வோம்: அன்புமணி

பாமகவின் உள் கட்சி பிரச்னைகளை நாங்களே பேசி தீர்த்துக்கொள்வோம் என்று கட்சியின் தலைவர் அன்புமணி ராமதாஸ் ஞாயிற்றுக்கிழமை தெரிவித்தார்.

பாமக சார்பில் 2025 ஆங்கிலப் புத்தாண்டையொட்டி, சிறப்புப் பொதுக் குழுக் கூட்டம் புதுச்சேரி அருகேயுள்ள பட்டானூரில் சனிக் கிழமை நடைபெற்றது. இதில் கட்சியின் நிறுவனர் மருத்துவர் ச.ராமதாஸ் நிறைவுரையாற்றி பேசியபோது, கட்சியின் இளைஞரணித் தலைவராக தனது மகள் வழிப் பேரன் ப.முகுந்தனை அறிவித்தார்.

அப்போது, மேடையில் அமர்ந்திருந்த மாநிலத் தலைவர் அன்புமணி ராமதாஸ், கட்சியில் சேர்ந்து நான்கு மாதங்களே ஆனவருக்கு இளைஞரணித் தலைவர் பதவி கொடுப்பது தவறானது. நன்றாக செயல்படக்கூடியவர்களுக்கு பொறுப்பு வழங்கவேண்டும் எனக் கூறி எதிர்ப்பு தெரிவித்தார்.

இதனால், இருவரிடையே வாக்குவாதம் ஏற்பட்டது. இதையடுத்து, அன்புமணி ராமதாஸ் மேடையிலிருந்து இறங்கிச் சென்றார்.