மனதில் உறுதி வேண்டும்

நீச்சல் அடிக்கத் தெரிந்தவர்கள் ஆற்றுக்குள் போய் வரலாம். ஆனால், வாழ்க்கையில் எதிர்நீச்சல் அடிக்கும் திறன் இருந்தால், வரலாற்றில்கூட இடம்பெறலாம்.

- எஸ். ராஜசேகரன்

வாழ்க்கையில் முன்னேற நினைக்கும் மனிதர்களுக்கு ஊக்கம் என்பது இன்றியமையாததாகும்.

ஊக்கத்தோடும், உற்சாகத்தோடும் செய்கின்ற எல்லாச் செயல்களும் வெற்றிகரமாக நடைபெறுகிறது. ஆனால், இன்றைய மனிதர்களில் எத்தனையோ பேர், தங்களிடம் தகுதிகளும், திறமைகளும் இருந்தும், ஊக்கமின்மையாலும், தாழ்வு மனப்பான்மையாலும் பின்தங்கி விடுகின்றனர். தாழ்வு மனப்பான்மை என்பது புற்றுநோயைவிடக் கொடியதாகும்.

மனிதர்கள் உருவத்தாலும், நிறத்தாலும், படிப்பாலும், பொருளாதாரத்தாலும் தாழ்வு மனப்பான்மை கொண்டு தங்களது தனித்திறமைகளைப் பற்றி தாங்களே குறைத்து மதிப்பிட்டுக் கொள்கிறார்கள். ஒருவர் தன்னைப் பற்றி குறைத்து மதிப்பிட்டுக் கொண்டால் மற்றவர்கள் அவரை எவ்வாறு உயர்வாக மதிப்பிடுவார்கள்?

உருவத்திற்கும், செயலுக்கும் தொடர்பு கிடையாது. சிறிய அங்குசம்தான் பெரிய யானையைக் கட்டுப்படுத்துகிறது. சிறிய மெழுகுவர்த்திதான், பெரிய இருளை அகற்றுகிறது. சிறிய உளிதான், பெரிய மலையை உடைக்கப் பயன்படுகிறது.

தங்கம் விலை அதிகம்தான். தகரம் விலை மலிவுதான். ஆனால், தகரத்தைக் கொண்டு செய்யவேண்டியதை, தங்கத்தைக்கொண்டு செய்யமுடியாது. அதனால் தகரமும் மட்டும் இல்லை, தங்கமும் உயர்ந்ததில்லை.