அரசுப் பள்ளிகளை தனியாருக்கு தத்துக் கொடுக்கவில்லை

அரசுப் பள்ளிகளைத் தனியாருக்கு தத்துக் கொடுக்கவும் இல்லை; தாரை வார்க்கவும் இல்லை என பள்ளிக் கல்வித் துறை அமைச்சர் அன்பில் மகேஸ் தெரிவித்தார்.

பள்ளிக் கல்வித் துறை மானியக் கோரிக்கை, அறிவிப்புகள் மற்றும் செயல்பாடுகள் குறித்து ஆய்வுக் கூட்டம் அமைச்சர் அன்பில் மகேஸ் தலைமையில் சென்னையில் வியாழக்கிழமை நடைபெற்றது. இதில் பள்ளிக் கல்வியின் அனைத்துத் துறை சார்ந்த இயக்குநர்கள் பங்கேற்றனர்.

இதைத் தொடர்ந்து, செய்தியாளர்களிடம் அமைச்சர் கூறியதாவது:

சமூகம் மற்றும் பெரு நிறுவனங்களின் பங்களிப்பைப் பெற்று அரசுப் பள்ளிகளை மேம்படுத்தும் 'நம்ம ஸ்கூல் நம்ம ஊரு பள்ளி' திட்டத்தை முதல்வர் மு.க.ஸ்டாலின் ரூ.5 லட்சம் அளித்து தொடங்கிவைத்தார்.

தற்போது இந்தத் திட்டத்துக்கு ரூ.504 கோடி நிதி கிடைத்துள்ளது. அதில், ரூ.350 கோடிக்கான பணிகள் தற்போது நடைபெற்றுக் கொண்டிருக்கின்றன. பள்ளிகளுக்குத் தேவையான மேஜைகள், நிதி உதவிகள் செய்வதைச் சார்ந்தது இந்தத் திட்டம்.