வங்கதேசம்: வரலாற்று பாடநூல்களில் முஜிபுர் ரஹ்மானுக்கு முக்கியத்துவம் குறைப்பு

பாகிஸ்தானுக்கு எதிரான வங்கதேச விடுதலைப் பிரகடனத்தை வெளியிட்டவர் முன்னாள் பிரதமர் ஷேக் ஹசீனாவின் தந்தை ஷேக் முஜிபுர் ரஹ்மான் என்பதை நீக்கிவிட்டு, அவரிடம் தளபதியாக இருந்த முன்னாள் பிரதமர் கலீதா ஜியாவின் கணவர் ஜியாவுர் ரஹ்மான்தான் அதைச் செய்ததாக பாடநூல்களில் இடைக்கால அரசு மாற்றம் செய்துள்ளது.

ஆரம்ப நிலை மற்றும் நடுநிலைப் பள்ளி பாடப்புத்தகங்களில் மேற்கொள்ளப்பட்டுள்ள இந்த மாற்றத்தின் கீழ், 1971 மார்ச் 26-ஆம் தேதி ஜியாவுர் ரஹ்மான்தான் வங்கதேசத்தின் சுதந்திரத்தை பிரகடனம் செய்தார். மறுநாள் ஷேக் முஜிபுர் ரஹ்மானுக்காக அவர் மீண்டும் ஒரு சுதந்திரப் பிரகடனத்தை வாசித்தார் என்று குறிப்பிடப்பட்டுள்ளது.

இது குறித்து இந்த மாற்றத்தில் முக்கிய பங்கு வகித்த எழுத்தாளரும் ஆய்வாளருமான ராக்கல் ரஹா கூறுகையில், 'மிகைப்படுத்தப்பட்ட மற்றும் திணிக்கப்பட்ட வரலாற்றை பாடப்புத்தகங்களிலிருந்து நீக்குவதற்காக இந்த நடவடிக்கை மேற்கொள்ளப்பட்டுள்ளது' என்றார்.

வங்கதேசம் உருவாவதற்குக் காரணமாக இருந்த விடுதலைப் பிரகடனத்தை முஜிபுர் ரஹ்மான்தான் உருவாக்கினார், அதை அப்போதைய ராணுவ துணை தளபதியாக இருந்த ஜியாவுர் ரஹ்மான் வாசித்து மட்டும்தான் காட்டினார் என்று முஜிபுரின் அவாமி லீக் கட்சியின் ஆதரவாளர்கள் கூறி வருகின்றனர்.