தில்லி நீதிபதி மீது விசாரணை

வீட்டில் கோடிக்கணக்கில் பணம் கைப்பற்றப்பட்ட விவகாரம்

புது தில்லி, மார்ச் 21: தில்லி உயர்நீதிமன்ற நீதிபதி யஷ்வந்த் வர்மாவின் அதிகாரபூர்வ இல்லத்தில் கட்டுக்கட்டாக கோடிக்கணக்கில் பணம் கைப்பற்றப்பட்டதாகக் கூறப்படும் நிலையில், அவர் மீது துறைசார் விசாரணை தொடங்கப்பட்டுள்ளதாக உச்சநீதிமன்றம் வெள்ளிக்கிழமை தெரிவித்தது.

சம்பந்தப்பட்ட நீதிபதியை அலகாபாத் உயர்நீதிமன்றத்துக்கு பணியிட மாற்றம் செய்வதற்கான நடைமுறையை கொலீஜியம் தொடங்கியுள்ளது. பணியிட மாற்ற முன்மொழிவு துறைசார் விசாரணையில் இருந்து வேறுபட்டது என்றும் உச்சநீதிமன்றம் தெரிவித்துள்ளது.

இந்த விவகாரத்தில், உச்சநீதிமன்றத் தலைமை நீதிபதியிடம் தில்லி உயர்நீதிமன்றத் தலைமை நீதிபதி விரைவில் அறிக்கை சமர்ப்பிப்பார் என எதிர்பார்க்கப்படுகிறது.