மதுரை மாவட்டத்தில் “வாழ்ந்து காட்டுவோம் திட்டத்தின்” கீழ் பயனாளிகளுக்கு ரூ.39.93 கோடி மதிப்பிலான உதவிகள் வழங்கப்பட்டுள்ளன

ஆட்சியர் சங்கீதா தகவல்

மதுரை மாவட்டத்தில் ஊரக வளர்ச்சி மற்றும் ஊராட்சி துறையின் கீழ் செயல்படுத்தப்பட்டு வரும் "வாழ்ந்து காட்டுவோம் திட்டம்" செயல்பாடுகள் குறித்து மாவட்ட ஆட்சித் தலைவர் மா.சௌ.சங்கீதா, மதுரை கிழக்கு ஊராட்சி ஒன்றியம் திருமோகூர் ஊராட்சியில் நேரடியாக ஆய்வு மேற்கொண்டு பயனாளிகளுடன் கலந்துரையாடினார்.

குறிப்பாக, திருமோகூரில் உள்ள வளையாபதி திருமண மஹாலில், வாழ்ந்து காட்டுவோம் திட்டத்தின் கீழ் பயன் அடைந்து தொழில் முனைவோராக உயர்ந்துள்ள பல்வேறு மகளிர் குழுக்கள் மூலம் அவர்களின் உற்பத்திப் பொருட்கள் காட்சிப்படுத்தப்பட்ட அரங்குகள் அமைக்கப்பட்டிருந்தன. இவற்றை மாவட்ட ஆட்சித்தலைவர் மா.சௌ.சங்கீதா பார்வையிட்டார்.

அதன்பின்பு, திருமோகூரில் செயல்பட்டு வரும் செம்பருத்தி தையல் தொழில் குழு கூடத்திற்கு நேரடியாக சென்று பார்வையிட்டு மகளிருடன் கலந்துரையாடினார்.

தொடர்ந்து, மாவட்ட ஆட்சித்தலைவர் மா.சௌ.சங்கீதா தெரிவித்ததாவது: வாழ்ந்து காட்டுவோம் திட்டம் (VKP) உலக வங்கியின் நிதி உதவியுடன் தொடங்கப்பட்ட ஒரு தனித்துவம் வாய்ந்த திட்டமாகும். இத்திட்டம் ஊரக பகுதிகளில் தொழில் மேம்பாடு, நிதி சேவைகளுக்கு வழிவகுத்தல் மற்றும் வேலை வாய்ப்புகளை உருவாக்குதல் போன்றவற்றின் மூலம் சமுதாயத்தில் நிலையான வளர்ச்சி என்பதை நோக்கமாகக் கொண்ட தனித்துவமிக்க திட்டமாகும். இத்திட்டம் துணை முதலமைச்சர் மேற்பார்வையில் செயல்பட கூடிய சிறப்பு திட்டமாகும்.

இத்திட்டம் மதுரை மாவட்டத்தில் திருப்பரங்குன்றம், மதுரை கிழக்கு, மேலூர் மற்றும் கொட்டாம்பட்டி ஆகிய நான்கு வட்டங்களில் 137 ஊராட்சிகளில் செயல்பட்டு வருகிறது.

இத்திட்டத்தின் மூலம் சுய உதவி குழு பெண்கள் மற்றும் அவர் குடும்பத்தை சார்ந்து உறுப்பினர்கள் முதன்மை பயனாளிகளாக பயன்பெற தகுதி உடையவர்கள், பெண்கள், ஆதிதிராவிட பழங்குடியினர், மாற்றுத்திறனாளிகள், இளைஞர்கள் மற்றும் ஆர்வமுள்ள தொழில் முனைவோர்களுக்கு முக்கியத்துவம் அளிக்கப்பட்டு திட்டங்கள் செயல்படுத்தப்பட்டு வருகிறது.