મેઘો હવે ઉત્તર અને મધ્ય ગુજરાતને ઘમરોળશે

અમદાવાદમાં ભારે વરસાદની આગાહી: કચ્છ-ઉત્તર ગુજરાતમાં આજે ઓરેન્જ-કાલે રેડ એલર્ટ જાહેર

અમદાવાદ, શનિવાર

રાજયમાં ફરી એક વા૨ વરસાદનો બીજો રાઉન્ડ શરૂ થવા જઈ રહ્યો છે. આ ચોમાસાની સિઝનમાં છેલ્લા ઘણા દિવસના વિરામ બાદ આજથી મેઘરાજા ધમાકેદાર એન્ટ્રી કરશે. જો કે આ વખતે દક્ષિણ ગુજરાત કે સૌરાષ્ટ્ર નહીં પરંતુ ઉત્તર ગુજરાતમાં આકાશી આફતનાં એંધાણ વરતાઈ રહ્યાં છે. રાજ્યમાં ભલે છેલ્લા બે દિવસથી વરસાદે વિરામ લીધો હોય પરંતુ વરસાદી આફત હજુ ટળી નથી. રાજસ્થાનથી ઉત્તર ગુજરાત પર ફરી આકાશી આફત આવી રહી છે. આજે અને આવતી કાલે ઉત્તર ગુજરાતમાં ભારેથી અતિભારે વરસાદની આગાહી વ્યક્ત કરવામાં આવી છે. હવામાન વિભાગ દ્વારા ભારે વરસાદની આગાહીના પગલે કચ્છ, ઉત્તર ગુજરાતમાં આજે ઓરેન્જ અને આવતી કાલે રેડ એલર્ટ જાહેર કરાયું છે. અમદાવાદમાં પણ ભારે વરસાદની સંભાવના છે અમદાવાદમાં લો પ્રેશરની અસર ગઈ કાલે શુક્રવારની રાતથી જ શરૂ થઈ ગઈ છે.