ઈતિહાસ રચાયોઃ દેશનાં ૧૫મા રાષ્ટ્રપતિ તરીકે દ્રૌપદી મુર્મૂએ શપથ ગ્રહણ કર્યાં

મુર્મૂના શપથગ્રહણ સાથે દેશને પ્રથમ આદિવાસી મહિલા અને સૌથી યુવા રાષ્ટ્રપતિ મળ્યાં

નવી દિલ્હી, સોમવાર

સંસદભવનના સેન્ટ્રલ હોલમાં ૬૪ વર્ષનાં દ્રૌપદી મુર્મુએ આજે દેશના ૧૫મા રાષ્ટ્રપતિ તરીકે હોદા અને ગુપ્તતાના શપથ ગ્રહણ કર્યાં હતાં. દેશના મુખ્ય ન્યાયમૂર્તિ (સીજેઆઈ) એન.વી. રમન્નાએ તેમને દેશના સર્વોચ્ચ બંધારણીય પદ માટે શપથ લેવડાવ્યા હતા. આ સાથે હવે દેશને પ્રથમ આદિવાસી મહિલા અને સૌથી યુવાન રાષ્ટ્રપતિ પ્રાપ્ત થયાં છે. દ્રૌપદી મુમ્મૂએ આજે રાષ્ટ્રપતિપદ માટે શપથ લઈને ઈતિહાસ રચી દીધો છે.

દ્રૌપદી મુર્મુના શપથગ્રહણ સમારોહમાં વડા પ્રધાન નરેન્દ્ર મોદી, વિદાય લેતા રાષ્ટ્રપતિ રામનાથ કોવિંદ, ઉપરાષ્ટ્રપતિ વેંકૈયા નાયડુ, લોકસભાના અધ્યક્ષ ઓમ બિરલા સહિત ગણમાન્ય અતિથિઓ ઉપસ્થિત રહ્યા હતા. રાષ્ટ્રપતિ પદના શપથ લીધા બાદ મુર્મુને ૨૧ તોપોની સલામી આપવામાં આવી હતી.