અમદાવાદીઓ આનંદોઃ ઓક્ટોબરના અંત સુધીમાં તમામ ૧૬.૫ લાખ ઘરમાં બે ડસ્ટબિન અપાઈ જશે

સાત મહિના પહેલાં સૂકો-ભીનો કચરો અલગ એકઠો કરવા મફતમાં ડસ્ટબિનનું વિતરણ શરૂ કરાયું હતું

અમદાવાદ, બુધવાર

શહેરમાં ડોર ટુ ડોર કચરો એકઠો કરવાની કામગીરી વર્ષોથી ચાલે છે. અગાઉ સખીમંડળોં જેવી એનજીઓને આ કામ સોંપાયું હતું, જે હવે ખાનગી કંપનીઓ હસ્તક છે, જોકે ખાનગી કંપનીઓ દ્વારા સંચાલિત આ કામગીરીને લગતાં અનેક ધાંધિયાં છે. થોડા સમય પહેલાં ઘાટલોડિયા જેવા વિસ્તારમાં કચરાગાડી ત્રણ-ચાર દિવસે પણ દેખાતી ન હોવાની ગંભીર ફરિયાદો ઊઠી હતી. આ પ્રકારે કચરો એકત્ર કરીને તેને પીરાણા ડમ્પસાઇટ ખાતે ફેંકવા લઈ જવાય છે, જોકે સૂકો અને ભીનો કચરો અલગ કરીને આપવાની માનસિકતા લોકોમાં હજુ કેળવાઈ નથી તો કોન્ટ્રાક્ટર્સ પણ આમાં ખાસ રસ દાખવતા નથી, જેના કારણે શહેરના ભાજપના શાસકો દ્વારા નાગરિકોને ઘરદીઠ મફતમાં બે ડસ્ટબિન અપાઈ રહ્યાં છે. આમાં લોકો માટે આનંદની બાબત એ છે કે આગામી ઓક્ટોબર મહિનાના અંત સુધીમાં શહેરનાં તમામ ૧૬.૫ લાખ ઘરમાં બે-બે ડસ્ટબિન અપાઈ જશે.