પાણીજન્ય રોગચાળાથી અમદાવાદમાં આ વર્ષે લોકો વધુ ‘ભયભીત' થયા

વર્ષ ૨૦૨૧માં ઝાડા-ઊલટી, કમળો, ટાઈફોઈડ અને કોલેરાના કુલ ૭,રર૯ કેસ સામે આ વર્ષે જુલાઈ અંત સુધીમાં ૬,૧૮૮ કેસ નોંધાયા

અમદાવાદ, શનિવાર

શહેરમાં ચોમાસાએ લોકોને રાડ પડાવી દીધી છે. તા. ૧૦ જુલાઇની સાંજે પડેલા મુશળધાર વરસાદને તો લોકો ક્યારેય ભૂલી શકશે નહીં. તે વખતે ત્રણથી ચાર દિવસ સુધી સમગ્ર અમદાવાદને ઠેરઠેર ભરાયેલાં વરસાદી પાણીએ બાનમાં લીધું હતું. હજુ પણ ક્યારેક તોફાની વરસાદ તો ક્યારેક ઝરમર વરસાદથી શહેરમાં ચોમાસાનો માહોલ લગભગ જળવાઈ રહ્યો છે. અત્યાર સુધીમાં અમદાવાદમાં ર૮.રર ઈંચ વરસાદ ખાબકી ચૂક્યો છે, પરંતુ વરસાદી મારથી ગટર ઊભરાવવાનો તેમજ દૂષિત પાણીનો પ્રશ્ન પણ પેચીદો બન્યો છે. આના કારણે સમગ્ર અમદાવાદમાં પાણીજન્ય રોગચાળાએ માથું ઊંચક્યું છે અને ઝાડા-ઊલટી, કમળો, ટાઈફોઈડ તથા કોલેરાના કેસ સતત વધી રહ્યા હોઈ - લોકોમાં ભય ફેલાયો છે. કોરોનાના - પ્રકોપ વચ્ચે સ્વાઈનફ્લૂના કેસ પણ ઝડપથી ફેલાતા હોઈ આવા બીમારીના માહોલમાં પાણીજન્ય રોગચાળાએ લોકોને ડરાવી દીધા છે.

અમદાવાદનાં વિવિધ સ્થળોએ વરસાદી પાણી ભરાતાં સ્વાભાવિકપણે મચ્છરનો ઉત્પાત વધ્યો છે, જેના પરિણામે ઝેરી મેલેરિયા, ડેન્ગ્યુ અને ચિકનગુનિયાના કેસમાં ઉછાળો આવ્યો છે. ગઈ કાલે મળેલી વોટર સપ્લાય કમિટીમાં શહેરના શાસકોએ વરસાદી પાણી ભરાવાના મામલે ઈજનેર વિભાગના ઉચ્ચ અધિકારીઓનો ઊધડો લીધો હતો.