ગુજરાતમાં વરસાદે 'રાસ' ખેલ્યોઃ ખેલૈયાઓ અને આયોજકોના શ્વાસ અધ્ધર કરી દીધા

અમદાવાદ, ભરૂચ, ડાંગ, નવસારી, સુરત, તાપી, વલસાડ, દમણ, દાદરા-નગર હવેલી, ખેડા, બનાસકાંઠા, જૂનાગઢ, અમરેલી, ભાવનગર, ગીરસોમનાથ, બોટાદમાં હળવાથી મધ્યમ વરસાદ પડશે

અમદાવાદ, બુધવાર

નવરાત્રિ દરમિયાન જ મેઘરાજા વરસાદી રમઝટ કરવાના મૂડમાં આવી ગયા છે, પરંતુ ખેલૈયાઓની ચિંતા આટલેથી જ અટકવાની નથી, કારણ કે હજુ પણ આગામી બે દિવસ રાજ્યમાં વરસાદી માહોલ રહેવાથી ખેલૈયાઓના રંગમાં મેઘરાજા વધુ બે દિવસ ભંગ પાડી શકે છે. આજે પણ શહેરમાં આકાશમાંથી વાદળો આવનજાવન કરે છે અને ખેલૈયાઓના શ્વાસ અધ્ધર થાય છે. અમદાવાદમાં બે દિવસ સામાન્ય વરસાદની શક્યતા વ્યક્ત કરવામાં આવી છે. શહેરમાં વાદળછાયું અને ઉકળાટભર્યું વાતાવરણ રહેવાના કારણે વરસાદની શક્યતા વધી છે, જેમાં સાંજે હળવાં ઝાપટાં પડી શકે છે, જોકે તે પછી શહેરમાં વરસાદની સંભાવના નહિવત્ છે. નવરાત્રિમાં સામાન્ય વરસાદ તો રહેશે જ પણ જતાં જતાં વરસાદ સૌરાષ્ટ્ર, ઉત્તર ગુજરાત અને દક્ષિણ ગુજરાતમાં વરસી જશે. ખેડા અને બનાસકાંઠામાં પણ વરસાદની આગાહી કરવામાં આવી છે. સોરાષ્ટ્રના જૂનાગઢ અને અમરેલીમાં પણ વરસાદની આગાહી છે. ભરૂચ, ડાંગ, નવસારી, સુરત, તાપી, વલસાડ, દમણ, દાદરા-નગર હવેલી, અમરેલી, ભાવનગર, ગીર-સોમનાથ, જૂનાગઢ, બોટાદમાં હળવાથી મધ્યમ વરસાદ પડશે. આજથી ચોમાસામાં તોફાની વરસાદના ગણાતા હસ્ત નક્ષત્રનો આરંભ થયો છે, જેના કારણે પણ વરસાદની શક્યતા વધી છે.