વન્ય જીવપ્રેમીઓ કાંકરિયાની 'ફ્રેન્ડ્સ ઓફ ઝૂ' સ્કીમનો લાભ લઈ પશુઓને દત્તક લો

છેલ્લાં ચાર વર્ષમાં કુલ ૧૧૬ પશુ-પક્ષી અને સરિસૃપને ચાહકોએ દત્તક લીધાં

અમદાવાદ, સોમવાર

આપણા શહેરનું કાંકરિયા સમગ્ર રાજ્યમાં પ્રતિષ્ઠા ધરાવે છે. અમદાવાદની મુલાકાતે આવનારા લોકો માટે આ પ્રાણીસંગ્રહાલયની લટાર મારવી જાણે કે ફરજિયાત બની હોય તેવી તેની લોકપ્રિયતા છે. કરોડો રૂપિયાના ખર્ચે કાંકરિયા લેકફ્રન્ટને મ્યુનિસિપલ કોર્પોરેશન દ્વારા વિકસિત કરાયા બાદ પ્રાણીસંગ્રહાલય પ્રત્યેનું આકર્ષણ લોકોમાં દેખીતી રીતે વધ્યું છે. તંત્ર દ્વારા પ્રાણીસંગ્રહાલયમાં રખાયેલા વિવિધ પ્રકારના વન્ય જીવોની સારસંભાળ તો રખાય જ છે, પરંતુ વન્ય જીવપ્રેમીઓ માટે સત્તાવાળાઓ દ્વારા આકર્ષક 'ફ્રેન્ડ્સ ઓફ ઝૂ' સ્કીમ જાહેર કરાઈ છે. આ સ્કીમ હેઠળ જે તે વ્યક્તિ કે સંસ્થા હાથણી, પ્રાણીસંગ્રહાલય હિમાલયન રીંછ, મોર, લવબર્ડ ઉપરાંત કિંગ કોબ્રા અને એનાકોન્ડા જેવા ખતરનાક જીવને દત્તક લઈ તેનો એક વર્ષ સુધીનો ખાધાખોરાકીનો ખર્ચ આપી શકે છે.