અલ કાયદાના ધરપકડ કરાયેલા ચાર સભ્યના અતીક અહેમદ કનેકશનની સઘન તપાસ શરૂ

અતીક અહેમદનાં મોત બાદ અલ કાયદાએ બદલો લેવાની ધમકી આપી હતીઃ NIA સહિતની એજન્સીઓ તપાસમાં ઝંપલાવશે

અમદાવાદ, બુધવાર

ઉત્તરપ્રદેશના બાહુબલી ગેંગસ્ટર અતીક અહેમદ અને તેના ભાઇની હત્યા બાદ આતંકી સંગઠન અલ કાયદાએ દેશમાં આતંકી હુમલા કરવાની ધમકી આપી હતી. આ ધમકીને સુરક્ષા એજન્સીઓએ ગંભીરતાથી લઇને તપાસનો ધમધમાટ શરૂ કર્યો હતો ત્યારે ગુજરાત એટીએસની ટીમે ચાર બાંગ્લાદેશીની ધરપકડ કરી છે, જે અલ કાયદા સાથે સંકળાયેલા હતા.

અતીક અહેમદનાં મોત બાદ અલ કાયદાએ આપેલી ધમકી અને ગુજરાત એટીએસની ટીમે ઝડપેલા ચારેય શખ્સનું ક્યાંક ને ક્યાંક કનેક્શન હોય તેવું લાગી રહ્યુ છે. ચોંકાવનારી વાત એ છે કે ગુજરાત એટીએસની ટીમે ચાર પૈકી બે આરોપીની ઉત્તરપ્રદેશના ગોરખપુરથી ધરપકડ કરી છે.