ક્રિએટિવ સિટી: અમદાવાદ હવે યુનેસ્કોમાં ડિઝાઈન ક્ષેત્રે દાવો કરી યશકલગી ઉમેરશે

અમદાવાદને ૮ જુલાઈ, ૨૦૧૭ના દિવસે યુનેસ્કો દ્વારા ‘ભારતનું સર્વપ્રથમ વર્લ્ડ હેરિટેજ શહેર' જાહેર કરાયું હતું: હવે આપણું શહેર ‘ક્રિએટિવ સિટી' બનશે

અમદાવાદ, ગુરુવાર

વિશ્વભરનાં સ્થાપત્ય, કળા, ડિઝાઇન, ફિલ્મ, સાહિત્ય, સંગીત વગેરેના વારસાને ન ફક્ત જાળવી રાખવા, પરંતુ આ અમૂલ્ય ધરોહરથી સમગ્ર પ્રજા વાકેફ થાય તે માટે યુનેસ્કો સતત પ્રયત્નશીલ છે. યુનેસ્કો દ્વારા છેક ૨૦૦૪માં યુનેસ્કો ક્રિએટિવ સિટીઝ નેટવર્ક (યુસીસીએન) જાહેર કરાયું હતું, જેમાં દુનિયાનાં શહેરોની આર્થિક, સામાજિક, સાંસ્કૃતિક અને પર્યાવરણને લગતી બાબતોને વધુ વિકસિત કરવા પર ભાર મુકાયો છે. ભારતનાં મુંબઈ, હૈદરાબાદ, ચેન્નઈ જેવાં કેટલાંક શહેર યુનેસ્કોની ક્રિએટિવ સિટીઝમાં સ્થાન પામી ચૂક્યાં છે અને હવે આપણા અમદાવાદે આ ગૌરવ પ્રાપ્ત કરવા માટે આગેકૂચ કરવા લીધી છે. મ્યુનિસિપલ કોર્પોરેશનના હેરિટેજ વિભાગ દ્વારા ડિઝાઇન ક્ષેત્રે અમદાવાદને ક્રિએટિવ સિટીની નવી યશકલગી યુનેસ્કો તરફથી મળે તેવા પ્રયાસો આરંભાયા છે.