અમદાવાદીઓએ ચાર દિવસ ગાજવીજ સાથેના વરસાદમાં ભીંજાવાની તૈયારી રાખવી પડશે

સ્ટ્રીટલાઇટના તમામ થાંભલા સુરક્ષિતઃ હજુ પણ ભારે પવન ફૂંકાશે

અમદાવાદ, શુક્રવાર

અતિ વિનાશક બિપરજોય વાવાઝોડાના કારણે ગઈ કાલે હજારો અમદાવાદીઓના જીવ તાળવે ચોંટ્યા હતા. શાળા-કોલેજોમાં પણ વિદ્યાર્થીઓની પાંખી હાજરી જોવા મળી હતી. ચોરે ને ચૌટે લોકો વાવાઝોડાની વાતો કરતા હતા. આજે પણ સવારથી ટીવી સામે લોકો ગોઠવાઈ ગયા છે. બિપરજોય વાવાઝોડાથી ગઈ કાલે શહેરમાં ભારે વરસાદ તો નહોતો પડ્યો, પરંતુ તોફાની પવન ફૂંકાયો હતો. જોકે આ વાવાઝોડું જખૌ ખાતે ત્રાટકીને હવે ઉત્તર ગુજરાત થઈ રાજસ્થાન તરફ આગળ વધી રહ્યું છે. તેમ છતાં તેની અસર અમદાવાદમાં વર્તાશે અને હજુ ચાર દિવસ ગાજવીજ સાથેના તોફાની વરસાદમાં ભીંજાવા માટે લોકોએ તૈયાર રહેવું પડશે. જૂનના છેલ્લા અઠવાડિયાથી અમદાવાદમાં ચોમાસું સત્તાવાર રીતે શરૂ થવાની શક્યતા છે.