બિપરજોયઃ ગાંધીધામમાં અનરાધાર, નડાબેટનું સૂકું રણ દરિયામાં ફેરવાયું

કચ્છમાં ચારે બાજુ તારાજીથી લોકો બેહાલઃ રાજકોટમાં રેલવે તાળામાં પાણી ભરાયાં: વાવાઝોડું હવે રાજસ્થાનમાં સાંજે ડિપ્રેશનમાં ફેરવાશે

અમદાવાદ, શુક્રવાર

અતિ વિનાશક વિનાશક બિપરજોય વાવાઝોડાથી કચ્છમાં ભારે તારાજી થઈ હોવાના સમાચાર પ્રકાશમાં આવી રહ્યા છે. આ વાવાઝોડાના પગલે કચ્છ-સૌરાષ્ટ્રમાં અતિ ભારે વરસાદ પડી રહ્યો હોઈ નદી-નાળાં છલકાઈ ઊઠ્યાં છે. ગાંધીધામમાં અનરાધાર વરસાદ નોંધાયો છે. છેલ્લા ૨૪ કલાકમાં આઠ ઈંચ વરસાદ ખાબકી ચૂક્યો હોઈ લોકો તોબા પોકારી ઊઠ્યા છે. વાવાઝોડાની અસરથી રાજ્યના ૨૦ જિલ્લાના ૧૦૧ તાલુકામાં હળવોથી અતિ ભારે વરસાદ પડી ચૂક્યો હોઈ નડાબેટનું સૂકું રણ દરિયામાં ફેરવાયું છે. આ લખાય છે ત્યારે પણ સવારે મોરબી, દ્વારકા, માંડવી, લોધિકા, રાજકોટ, જામનગરમાં મુશળધાર વરસી રહ્યો હોઈ સવારની ચા માટે વરસાદ દૂધ મેળવવા પણ ગૃહિણીઓને ફાંફાં પડી રહ્યાં છે.