રથયાત્રા: જગપ્રસિદ્ધ ઝૂલતા મિનારા ફરીથી કોમી એકતાનું પ્રતીક બન્યા

છેલ્લા ત્રણ દાયકાથી અમદાવાદ શહેર મુસ્લિમ એકતા સમિતિ જગન્નાથ મંદિરના મહંતનું ભાવભીનું સ્વાગત કરે છેઃ લઘુમતી સમાજના આદરસ્થાનનું પ્રતીક ભેટરૂપે આપીને ભાઈચારામાં વૃદ્ધિ કરવાના નિષ્ઠાવાન પ્રયાસ

અમદાવાદ, મંગળવાર

આજે અષાઢી બીજે શહેરની અસ્મિતાના પ્રતીકરૂપ ભગવાન જગન્નાથજીની ૧૪૬મી રથયાત્રા નીકળી છે. બિપરજોયના મહાસંકટે ઝીરો કેઝ્યુલિટીમાં વિદાય લેતાં ભક્તોમાં ભક્તિનો અનેરો જોશ ફેલાયો છે. આ રથયાત્રાને લઘુમતી સમાજના બિરાદરો પણ હોંશથી આવકારતા આવ્યા છે. આમાં એ વાત જાણીને સૌને તાજ્જુબ થશે કે વર્ષોથી જગન્નાથજીના મહંતનું લઘુમતી સમાજ દ્વારા ગઠિત એક સમિતિ ઉમળકાભેર સ્વાગત કરે છે. આ વર્ષે સમિતિમાં જગપ્રસિદ્ધ ઝૂલતા મિનારાનું પ્રતીક તેમને ઉપહાર સ્વરૂપે -આપવા સમિતિના સભ્યોમાં થનગનાટ જોવા મળ્યો છે.