ડિમોલિશન: ચાંદખેડામાં ગેરકાયદે રહેણાક બાંધકામને તોડી પડાયું

શાહપુર, દરિયાપુર અને ખાડિયામાં મ્યુનિ. તંત્ર દ્વારા ગેરકાયદે બાંધકામો પર હથોડા ઝીંકાયા

અમદાવાદ, શનિવાર

મ્યુનિસિપલ કોર્પોરેશનના સત્તાવાળાઓ દ્વારા શહેરભરમાં ગેરકાયદે બાંધકામો પર કોઈની પણ શેહશરમ રાખ્યા વિના બેધડકપણે હથોડા ઝીંકાઈ રહ્યા છે. ચોમાસાની ઋતુમાં તંત્રએ સતત ડિમોલિશન ડ્રાઈવ ચાલુ જ રાખી છે. સત્તાધીશોએ ગેરકાયદે બાંધકામો સામે તેને જમીનદોસ્ત કરવાની આકરી કાર્યવાહી હાથ ધરી હોવાથી આ બાબત અમદાવાદમાં ચર્ચાસ્પદ બની છે, જોકે અનેક લોકોએ તંત્રના ઓપરેશન ડિમોલિશનને મોકળા મને વધાવી પણ લીધું છે. દરમિયાન, પશ્ચિમ ઝોનના ચાંદખેડામાં એસ્ટેટ વિભાગે રહેણાક પ્રકારના ગેરકાયદે બાંધકામને તોડી નાખ્યું હોવાની વિગતો જાણવા મળી છે.