મેઘરાજા મૂડમાં નથીઃ અમદાવાદીઓ વીકએન્ડમાં બહાર ફરવા જઈ શકશે

રાજ્યમાં હજુ પણ વરસાદી ઝાપટાંથી સંતોષ માનવો પડશે

અમદાવાદ, શુક્રવાર

ગુજરાતમાં ચોથા રાઉન્ડના વરસાદની રાહ જોતા ખેડૂતો માટે નિરાશાજનક સમાચાર છે. હજુ સુધી રાજ્યમાં વરસાદી સિસ્ટમ ઉદ્ભવી ન હોવાથી આગામી દિવસોમાં પણ મેઘરાજા આરામના મૂડમાં જ રહેવાના છે. રાજ્યમાં વરસાદી ઝાપટાં જેવો છૂટોછવાયો વરસાદ પડી શકે છે. આ સિવાય હજુ પણ ક્યાંય ભારે વરસાદની આગાહી સ્થાનિક હવામાન વિભાગ દ્વારા કરવામાં આવી નથી.

દરમિયાન, અમદાવાદીઓ માટે સારા સમાચાર એ છે કે વરસાદ ખેંચાઈ જવાથી શનિવારરવિવારના વીકએન્ડમાં લોકો પિકનિક કે ફરવા માટે બહાર જઈ શકશે. વરસાદનું કોઈ વિઘ્ન નડવાની શક્યતા હાલ દેખાતી નથી.