તસ્કરોનો ત્રાસઃ ગઠિયાઓએ ચાલુ ટ્રેનમાં વૃદ્ધ દંપતીના સાત લાખના દાગીના ચોરી લીધા

વૃદ્ધ દંપતી સૂઈ રહ્યું હતું ત્યારે ગઠિયાએ દાગીનાની ચોરી કરી: મણિતગર રેલવે સ્ટેશનમાં બેગ ચેક કરી ત્યારે ચોરી થઈ હોવાનું સામે આવ્યું

પેસેન્જર્સ હવે ટ્રેનમાં મુસાફરી કરતાં પહેલાં દસ વખત વિચાર કરી રહ્યા છે તેની પાછળનું કારણ તસ્કરોનો તરખાટ છે. રેલવે સ્ટેશન તેમજ ચાલુ ટ્રેનમાં તસ્કરો આંખના પલકારામાં પેસેન્જર્સ ના કીમતી સરસામાનની ચોરી કરીને ફરાર થઇ જાય છે. રેલવે સ્ટેશનમાં ચોરીની ઘટનાનું પ્રમાણ વધ્યું છે ત્યારે તેની સામે ડિટેક્શનનું પ્રમાણ નહીંવત્ છે. પોલીસ ચોરી કરતી ગેંગને ઝડપી શકતી નથી, જેના કારણે તેમની હિંમત વધી ગઇ છે અને તે પેસેન્જર્સના સરસામાનની ચોરી કરીને જતા રહે છે. કેરળથી અમદાવાદ ભાણેજનાં લગ્નમાં આવી રહેલા વૃદ્ધ દંપતીની યાત્રા તસ્કરોએ બગાડી છે. તસ્કરો દંપતીની બેગ ખોલીને તેમાંથી સાત લાખ રૂપિયાના દાગીનાની ચોરી કરીને ફરાર થઇ ગયા છે.

ટ્રેનમાં મુસાફરી કરવાનો હરખ સૌ કોઇને હોય છે અને તેમાં પણ જ્યારે કોઇ મુસાફર પરિવાર સાથે હરવા-ફરવા જતો " હોય અથવા તો સારા પ્રસંગમાં જતો હોય ત્યારે તેનો હરખ ડબલ થઇ જતો હોય છે. મુસાફરોના " હરખ પર પાણી ફેરવી દેવા માટે તસ્કરો રાત-દિવસ એક્ટિવ હોય છે. ચાલુ ટ્રેનમાં જ્યારે પેસેન્જર સૂતા હોય ત્યારે તસ્કરો તેમનો કીમતી સરસામાન ચોરી લેતા હોય છે. પેસેન્જર જ્યારે દાગીના પહેરીને ટ્રેનની બારી પાસે બેઠા હોય છે ત્યારે સ્નેચર્સ ગણતરીની સેકન્ડોમાં દાગીના ખેંચીને જતા રહે છે. આ સાથે રેલવે સ્ટેશનમાં મોબાઇલ-પર્સની ચોરી પણ ખૂબ થઇ રહી છે.