જલસો પડી જવાનોઃ અમદાવાદીઓ સાત દિવસ કાંકરિયા કાર્નિવલના રંગે રંગાશે

મુખ્યપ્રધાન ભૂપેન્દ્ર પટેલ આજે સાંજે કાર્નિવલ-ર૦ર૪'ને ખુલ્લો મૂકશે કાર્નિવલમાં પહેલી વખત ડ્રોન શો, અંડરવોટર ડાન્સ અને દુબઈમાં યોજાતો હ્યુમન પાયરો શો લોકોનાં મન મોહી લેશે

આજથી મ્યુનિસિપલ કોર્પોરેશન દ્વારા આયોજિત કાંકરિયા કાર્નિવલનો રંગારંગ પ્રારંભ થઇ રહ્યો છે, જેમાં લાખોની સંખ્યામાં અમદાવાદીઓ મનોરંજન માણવા માટે આવશે. સંગીતના સૂરે તેમજ રંગબેરંગી લાઇટોથી કાંકરિયા તળાવ દીપી ઊઠશે. રાજ્યના મુખ્યપ્રધાન ભૂપેન્દ્ર પટેલ સાંજના સાત વાગ્યે કાંકરિયા કાર્નિવલનો શુભારંભ કરાવશે. કાંકરિયા કાર્નિવલના શુભારંભ દરમિયાન ભૂપેન્દ્ર પટેલ અંદાજિત ૮૬૮ કરોડ રૂપિયાના વિવિધ પ્રજાલક્ષી વિકાસ પ્રકલ્પનાં લોકાર્પણ કરશે. આ કાંકરિયા કાર્નિવલ ૩૧ ડિસેમ્બર સુધી ચાલશે, જેમાં વિવિધ પ્રકારનું મનોરંજન પૂરું પાડવામાં આવશે. આ વર્ષે કાંકરિયા કાર્નિવલમાં પહેલી વખત ડ્રોન શો, અંડરવોટર ડાન્સ અને દુબઈમાં યોજાતો હ્યુમન પાયરો શો થશે.

દુબઈમાં યોજાતો હ્યુમન પાયો શો જોવા માટે લોકો દૂર-દૂરથી આવશે. જે લોકો દુબઈ જઈ નથી શકતા તેઓ અમદાવાદના કાંકરિયા ખાતે આવીને હ્યુમન પાયરો શો નિહાળી શકશે. આજે ઉદ્ઘાટન દરમિયાન આરોગ્યપ્રધાન ઋષિકેશ પટેલ, સહકારપ્રધાન જગદીશ વિશ્વકર્મા, સાંસદ હસમુખ પટેલ, સાંસદ દિનેશ મકવાણા, સાંસદ નરહિર અમીન, મેયર પ્રતિભા જૈન, મ્યુનિસિપલ કમિશનર એમ. થેન્નારસન, ડેપ્યુટી મેયર જતીન પટેલ, સ્ટેન્ડિંગ કમિટીના ચેરમેન દેવાંગ દાણી સહિતના નેતાઓ હાજર રહેશે.