દેશનાં ૧૫ રાજ્યમાં ગાઢ ધુમ્મસઃ હિમાચલ પ્રદેશમાં તાપમાન માઇનસ ડિગ્રીએ પહોંચ્યુ

દિલ્હીમાં ગાઢ ધુમ્મસ છવાયું જમ્મુ-કાશ્મીરમાં હિમવર્ષાના કારણે અનેક રસ્તાઓ બંધ

સમગ્ર દેશના તાપમાનમાં ઘટાડો થયો છે અને માઈનસ ડિગ્રીએ પહોંચી ગયું હતું. સમગ્ર ઉત્તર ભારતમાં કાતિલ ઠંડી વચ્ચે ઉત્તર-પૂર્વનાં કેટલાંક રાજ્યમાં ભારે વરસાદ અને કરા પડવાની સંભાવના છે. ગઈ કાલે પશ્ચિમ બંગાળ, સિક્કિમ અને આસામના હિમાલયના ભાગમાં ભારે વરસાદ અને કરા પડ્યા હતા. આજે પણ અહીં વરસાદ અને કરા પડવાની સંભાવના છે.

હિમાચલ પ્રદેશ, જમ્મુ-કાશ્મીર અને લદ્દાખમાં લઘુતમ તાપમાન ઝીરોથી ત્રણ ડિગ્રી સેલ્સિયસ પર પહોંચી ગયું છે. જમ્મુ-કાશ્મીર અને હિમાચલ પ્રદેશનાં પહાડી રાજ્યમાં સતત હિમવર્ષા થઇ રહી છે, જેના કારણે મેદાની વિસ્તારોમાં પણ કાતિલ ઠંડી વધી છે. દેશનાં ૧૫ રાજ્ય દિલ્હી, પંજાબ, હરિયાણા, ચંડીગઢ, હિમાચલ પ્રદેશ, ઉત્તરપ્રદેશ, મધ્યપ્રદેશ, બિહાર, ઓડિશા, આસામ, મેઘાલય, ત્રિપુરા, મિઝોરમ, નાગાલેન્ડ અને મણિપુરમાં આજે ગાઢ ધુમ્મસનું ઓરેન્જ એલર્ટ જારી કરાયું છે અને મધ્યપ્રદેશના નવ જિલ્લામાં કોલ્ડ ડેનું એલર્ટ છે.