குறைந்த தீவிரமுடைய சிறுவர் துன்புறுத்தல் சம்பவங்கள் அதிகரிப்பு

சிங்கப்பூரில் கடந்த சில ஆண்டுகளில், குறைந்த தீவிரமுடைய சிறுவர் துன்புறுத்தல் சம்பவங்கள் தொடர்ந்து அதிகரிப்பதாகத் தெரிவிக்கப்பட்டுள்ளது.

- அனுஷா செல்வமணி

துன்புறுத்தலுக்கு ஆளான சிறுவர்களில் பெரும்பாலானோர் தொடக்கப் பள்ளி மாணவர்கள் என்று கூறப்பட்டது.

2021ஆம் ஆண்டு பதிவான இத்தகைய 2,377 சம்பவங்களைவிடச் சென்ற ஆண்டு 17 விழுக்காடு அதிகமாக 2,787 சம்பவங்கள் பதிவாயின.

துன்புறுத்தல் சம்பவங்கள் அதிகம் பதிவானதற்கு, அதிகரிக்கும் விழிப்புணர்வு, குடும்ப வன்முறை குறித்துப் புகாரளித்தல், மேம்பட்ட கண்டறியும் முறை ஆகியவை காரணம் என்று கருதப்படுகிறது.

சமுதாய, குடும்ப மேம்பாட்டு அமைச்சு, செப்டம்பர் 26ஆம் தேதி முதல்முறையாக வெளியிட்ட குடும்ப வன்முறை அறிக்கையில் இத்தகவல்கள் இடம்பெற்றுள்ளன.

குழந்தை, கணவன், மனைவி, முதியோர் துன்புறுத்தல் சம்பவங்கள் தொடர்பான முக்கிய நிலவரங்கள் அறிக்கையில் இடம்பெற்றுள்ளன.

சமூக அமைப்புகள், சமுதாய, குடும்ப மேம்பாட்டு அமைச்சின் சிறுவர், பெரியவர் பாதுகாப்பு சேவை கையாண்ட சம்பவங்களிலிருந்து எடுக்கப்பட்ட தகவல்களின் அடிப்படையில் அந்த அறிக்கை வெளியிடப்பட்டுள்ளது.