நாதன்: பொய்யை ரயீசா தொடர வேண்டும் என்று விரும்பினேன்

உண்மையை ஒப்புக்கொள்வதற்கான முறையான திட்டம் ஏதும் இல்லாததால் பாட்டாளிக் கட்சியின் முன்னாள் நாடாளுமன்ற உறுப்பினர் ரயீசா கான் அவரது பொய்யைத் தொடரவேண்டும் என்று தாம் விரும்பியதைக் கட்சியில் அவருடன் இணைந்து செயலாற்றிய திரு யுதிஷ்திரநாதன் நீதிமன்றத்தில் ஒப்புக்கொண்டுள்ளார்.

பாட்டாளிக் கட்சியின் தலைமைச் செயலாளர் பிரித்தம் சிங் தொடர்பில் நீதிமன்றம் நடைபெறும் விசாரணையின் ஆறாம் நாளன்று (அக்டோபர் 21) திருநாதன், தற்காப்புத் தரப்பு வழக்கறிஞர் ஆன்ட்ரே ஜுமபோயால் விசாரிக்கப்பட்டபோது அவ்வாறு கூறினார்.

இதனைத் தொடர்ந்து, திருநாதன் நீக்கிய குறுஞ்செய்திகளின் பிரதியைக் கோரி தற்காப்புத் தரப்பு நீதிமன்றத்தில் விண்ணப்பித்தது.

முன்னாள் நாடாளுமன்ற உறுப்பினர் ரயீசா கானிடம் பொய்யுரைகள் பற்றி என்ன செய்யச் சொன்னார் என்பதன் தொடர்பில் திரு சிங் இரண்டு முறை நாடாளுமன்றச் சிறப்பு விசாரணைக்குழுவின் முன்னிலையில் பொய் சொன்னதாக அவர் மீதுள்ள குற்றச்சாட்டுகள் குறிப்பிடுகின்றன.

வழக்கின் மூன்றாவது சாட்சியாக முன்னிலையான திரு நாதன், 2021 அக்டோபர் 12ஆம் தேதியன்று திருவாட்டி கானைச் சந்தித்த பிறகு, அவர் உண்மையை ஒப்புக்கொள்வதற்கு வகை செய்யும் தகுந்த திட்டத்தை பாட்டாளிக் கட்சி உருவாக்கவில்லை என்று கவலைப்பட்டதை திரு நாதன் ஒப்புக் கொண்டார்.