தன்னலமற்ற சேவைக்காக ஆக உயரிய அதிபர் விருது

கடந்த 50 ஆண்டுகளுக்கும் மேலாக தமது வாழ்க்கையைத் தொண்டூழியத்துக்கு அர்ப்பணித்துள்ளவர் டாக்டர் எஸ்.வாசு, 83.

- அனுஷா செல்வமணி

இவர் 1970களில் அங் மோ கியோ சமூக சேவை நிலையம் தொடங்க உதவியதுடன் பல தலைமுறைச் சமூக சேவையாளர்களுக்கு ஊக்கமளித்து, குடும்பங்களுக்கும் தோள் கொடுத்துள்ளார்.

அவரது சேவையை அடையாளம் கண்டு அவருக்கு ‘நல்ல தலைவர்கள்’ எனும் பிரிவில் தொண்டூழியம் மற்றும் அறக்கொடைக்கான அதிபரின் விருது வழங்கப்பட்டது.

“பிறருக்கு உதவ வேண்டும் என்பது பத்து வயதிலிருந்தே என் ரத்தத்தில் ஊறிய ஒன்று. சிறுவயதிலிருந்தே தொண்டில் ஈடுபட்டு வந்ததால் அதைக் கைவிட முடியாமல் செய்துகொண்டே இருக்க உந்துதல் தொடர்கிறது,” என்று சொன்னார் டாக்டர் எஸ்.வாசு.

இந்த ஆண்டு 12வது முறையாக நடைபெற்ற தொண்டூழியம் மற்றும் அறக்கொடைக்கான அதிபரின் விருது விழாவில் டாக்டர் எஸ். வாசுவைச் சேர்த்து 13 பேர் விருது வழங்கி அங்கீகரிக்கப்பட்டனர்.

ராஃபிள்ஸ் ஹோட்டலில் புதன்கிழமை மாலை நடைபெற்ற விருது விழாவில் அதிபர் தர்மன் சண்முகரத்னம் தம் துணைவியாருடன் சிறப்பு விருந்தினராகக் கலந்துகொண்டு விருதுகளை வழங்கினார்.