பெஸ்ட் டெங்கி, ஆப்பிள் ஸ்டோர் போன்ற வர்த்தகங்களைக் குறிவைக்கும் மோசடி கும்பல்

கடன் அட்டையைப் பயன்படுத்தி ஆப்பிள் ஸ்டோர், பெஸ்ட் டெங்கி போன்ற சில்லறை விற்பனையாளர்களைக் குறிவைத்து, மோசடியில் ஈடுபட வெளிநாட்டினரைச் சிங்கப்பூருக்கு அனுப்பும் போக்கு அண்மைக் காலமாக அதிகரித்து வருகிறது.

இது தீவு முழுவதும் உள்ள சில்லறை விற்பனையாளர்களைக் கவலையில் ஆழ்த்தியுள்ளது.

சிங்கப்பூரில் இணைய மோசடிகளால் பாதிக்கப்பட்டவர்களின் கடன் அட்டை விவரங்களை மோசடிக்காரர்கள் திருடியதாக நம்பப்படுகிறது.

அந்த விவரங்களைத் தொடர்பில்லாக் கட்டணங்கள் செலுத்தும் முறையில் பயன்படுத்துவதற்கு ஏற்றவாறு அவற்றை கைப்பேசி செயலி ஒன்றில் பதிவேற்றம் செய்து வெளிநாட்டிலிருந்து மோசடிக்காரர்கள் கட்டுப்படுத்துவதாகக் கூறப்படுகிறது.