மக்கள் விரும்பி நாடும் ‘டிங்காட்' சேவை

பரபரப்பான வாழ்க்கைச் சூழலில் பலருக்கு வீட்டில் சமைத்துச் சாப்பிடுவதற்கு நேரம் கிடைப்பதில்லை. இல்லப் பணிப்பெண்கள் இல்லாதோர் பெரும்பாலும் கடையில் வாங்கிச் சாப்பிடுவதையே நிரந்தரத் தீர்வாகக் கொண்டுள்ளனர்.

- அனுஷா செல்வமணி

அண்மைய காலமாக ‘டிங்காட்’ (Tingkat) உணவுச் சேவை, வாடிக்கையாளர்கள் மத்தியில் பிரபலமாகி வருகிறது.

வீட்டு அடிப்படையிலான உணவுத் தொழில் நடத்துபவர்கள் இச்சேவையை அறிமுகப்படுத்தியுள்ளனர். ஒவ்வொரு வாரத்திற்குமான உணவுப் பட்டியலிலிருந்து வாடிக்கையாளர்கள் அவர்களுக்குப் பிடித்தமான உணவுவகைகளைத் தேர்வு செய்து வாங்கிக்கொள்ளலாம்.

இந்தச் சேவையை நாடுபவர்கள் குறிப்பிட்ட ஒரு கட்டணத்துக்கு மூன்று வேளைக்கான உணவை வாங்கிக்கொள்ளலாம். ஆரோக்கியம் நிறைந்த வீட்டு உணவைச் சாப்பிடுவதுமன்றி, பணத்தையும் நேரத்தையும் மிச்சப்படுத்துவதாக வாடிக்கையாளர்கள் கூறுகின்றனர்.

உணவகத்தில் டிங்காட் சேவை

பல நிகழ்ச்சிகளுக்கு உணவுத் தருவிப்புச் சேவை வழங்குவது மட்டுமின்றி, 20 ஆண்டுகளுக்கும் மேலாகச் செயல்பாட்டில் இருக்கும் பிருந்தாஸ் உணவகம் ‘டிங்காட்’ சேவையைச் சேர்த்துள்ளது.

வீடுகளுக்கு உணவு விநியோகச் சேவையையும் செய்துவரும் இந்த உணவகம், வாடிக்கையாளர்களின் கோரிக்கை காரணமாக ‘டிங்காட்’ சேவையை அறிமுகப்படுத்தியுள்ளது.

“எங்களுக்கு நீண்டநாள் வாடிக்கையாளர்கள் பலர் உள்ளனர். அவர்கள் எங்கள் உணவகத்திற்கு வந்து சாப்பிடாமல் இருந்தாலும் அவர்களின் வீடுகளுக்கு எங்களின் உணவு அடிக்கடி விநியோகம் செய்யப்படும்.

“வாடிக்கையாளர்கள் தினந்தோறும் செலவுசெய்து சாப்பிடுவதற்குப் பதிலாக ஒரு குறிப்பிட்ட கட்டணத்தைச் செலுத்தி அந்த வாரத்திற்குத் தேவையான உணவைப் பெற்றுக்கொள்ளலாம்,” என்றார் பிருந்தாஸ் உணவக உரிமையாளர் வீரப்பன், 55.

‘டிங்காட்’ சேவையை அணுகும் வாடிக்கையாளர்கள் பெரும்பாலும் வயதானவர்கள் என்று அறியப்படுகிறது.

“முதியோர் சிலர் தனியாக வசிக்கிறார்கள். அவர்களுக்குச் சமைத்துத் தர வீட்டில் யாருமில்லை அல்லது இல்லப் பணிப்பெண் வைத்துக்கொள்ளும் வசதி இல்லை,” என்று வீரப்பன் சொன்னார்.