కైవల్యమిచ్చే కార్తికం

కార్తిక మాసానికి సమానమైన మాసం లేదు, సత్యయు గంతో సమానమైన యుగమేదీ లేదు, వేదాలతో సమానమైన శాస్త్రమేదీ లేదు, గంగానది వంటి పవిత్రమైన నది మరొకటి లేదు.

- డా|| దేవులపల్లి పద్మజ

కార్తిక మాసానికి సమానమైన మాసం లేదు, సత్యయు గంతో సమానమైన యుగమేదీ లేదు, వేదాలతో సమానమైన శాస్త్రమేదీ లేదు, గంగానది వంటి పవిత్రమైన నది మరొకటి లేదు.

న కార్తికసమో మాసో న కృతేన

సమయం యుగమ్

న వేద సదృశం శాస్త్రం న తీర్థం

గంగయా సమమ్ ॥

కృత్తికా నక్షత్రంలో చంద్రుడు పూర్ణుడై సంచరించటం వల్ల ఈ మాసానికి కార్తిక మాసమని పేరు వచ్చింది. ప్రతి ఏటా దీపావళి వెళ్లిన మర్నాటి నుంచి కార్తిక మాసం ప్రారంభం అవుతుంది. వెన్నెల శోభలతో అలరారే శరత్ ఋతువులో వచ్చే రెండవ నెల కార్తిక మాసం.

పూర్వం నైమిశారణ్య ఆశ్రమంలోశౌనకాది మహామునులకు సూతక మహాముని కార్తీక మాస వ్రత వైభవాన్ని వివరించినట్లు మనకు పురాణాల ద్వారా తెలుస్తోంది. కార్తిక మాసం మానవునకు ఇహమునకు ఈతిబాధలు తొలగించి పరమును మోక్షము కలిగిస్తుందని తెలియచేస్తాడు. ఈ మాసంలో వనంలో బంధువులు, స్నేహితులతో కలిసి శివ కేశవులను, ఉసిరిచెట్టును పూజించి, సాత్విక ఆహారంలో వనభోజనాలు చేయడం శ్రేయస్కరం.