మృదు నైపుణ్యాలు

తరగతి గదిలో చాలా మంది విద్యార్థులుంటారు. ఉపాధ్యాయుడు అందరికీ ఒకే రకంగా పాఠాలు చెప్తారు. కానీ కొందరు దానిని బాగా గ్రహించగలరు. మరికొందరు ఒక మాదిరిగా గ్రహిస్తారు. ఇంకొందరి మెదళ్లకు ఏ విషయమూ చేరదు. అలాంటివారు ఎందుకూ పనికిరాని మొద్దులుగా అనిపిస్తారు.

- దాసరి శివకుమారి

 

దీనికి ప్రధాన కారణం.. పాఠాన్ని మనసు పెట్టి వినే శ్రద్ధ లేకపోవటం.విషయం మీద ఆసక్తి లేకపోవటం.ఇవన్నీ కారణాలవుతున్నాయి. మరో ప్రధాన కారణం.. తరగతి గదిలో విని వచ్చినదాన్ని ఇంట్లో అభ్యాసం చేయకపోవటం.

అభ్యాసమంటే ఇక్కడ ఒక ప్రాచీన విషయాన్ని మనం గుర్తు చేసుకోవచ్చు.విద్య ఏమాత్రం వంటబట్టని ఒక విద్యార్థిని గురుకులం నుండి గురువుగారు ఇంటికి పంపేస్తారు.చేసేదేం లేక శిష్యుడు ఇంటిదారి పట్టాడు. అతడు దారిలో మంచినీళ్ల కోసమని ఒక బావి దగ్గర ఆగాడు. నీళ్లు తోడుకుందామని బావి గట్టున పెట్టిన వున్న కడవను పైకెత్తితే కడవ వుంచిన చోట రాతి మీద కోసుకుపోయి కడవ పెట్టిన గుర్తు కనపడింది. అలాగే నీళ్లు తోడే చేంతాడును పైకి తీస్తే తాడును పెట్టిన చోట కూడా గుర్తు కనపడింది. మాటి మాటికీ అందరూ వాడికడవను, తాడునూ ఒకే చోట వుంచినందువలన కఠినమైన రాయి మీద కూడా గుర్తులు పడ్డాయి.అలాగే మళ్లీ మళ్లీ చదివితే నా మనసులో మాత్రం చదువుగుర్తులు ఎందుకు పడవు? అన్న ఆలోచన అతనికి వచ్చింది. వెంటనే వెనుదిరిగి గురుకులానికి వెళ్లాడు. అక్కడే వున్నాడు.పట్టుదలతో చదివి అపార విద్యావంతుడయ్యాడు. అతడే మొదట వరదరాజ్ అనే మందకొడి విద్యార్థి. ఆ తర్వాత దేశానికే గర్వకారణమైన 'అష్టాధ్యాయి' అనే వ్యాకరణ గ్రంథాన్ని రాసి ‘పాణిని’గా ప్రసిద్ధుడయ్యాడు.