ശ്രീപത്മനാഭസ്വാമി ക്ഷേത്രത്തിലെ അജ്ഞാതമായ വസ്തുതകൾ

ഉത്തമ വൈഷ്ണവ സങ്കേതങ്ങൾ എപ്രകാരമായിരിക്കണമെന്ന് ആഗമങ്ങൾ ചൂണ്ടിക്കാണിക്കുന്നുണ്ട്

- ദേവദേവൻ

ഉത്തമ വൈഷ്ണവ സങ്കേതങ്ങൾ എപ്രകാരമായിരിക്കണമെന്ന് ആഗമങ്ങൾ ചൂണ്ടിക്കാണിക്കുന്നുണ്ട്. പ്രധാന ദേവനെ കൂടാതെ ശ്രീകൃഷ്ണൻ, നരസിംഹമൂർത്തി, ശ്രീരാമസ്വാമി എന്നിവരെ ഒരേ സങ്കേതത്തിൽ പ്രതിഷ്ഠിച്ച് ആരാധനകൾ നടത്തണമെന്നാണ് ഇതിൽ പറയുന്നത്. ഇപ്രകാരമുള്ള ദക്ഷിണഭാരതത്തിലെ അമ്പതോളം ക്ഷേത്രങ്ങളിൽ ഒന്നും കേരളത്തിലെ ഏക ക്ഷേത്രവുമാണ് ശ്രീ പത്മനാഭസ്വാമി ക്ഷേത്രം. രാമാവതാരത്തിന് മുമ്പുള്ള യോഗനിദ്രാഭാവമാണ് ശ്രീപത്മനാഭസ്വാമിയുടെ സാന്നിധ്യഭാവം. ശയനരൂപത്തിലുള്ള മഹാവിഷ്ണുവിനെ ശ്രീരാമസ്വാമിയായും, നിൽക്കുന്ന മഹാ വിഷ്ണുവിനെ ശ്രീകൃഷ്ണനായും സങ്കൽപ്പിക്കുന്ന സമ്പ്രദായമുണ്ട്.

മൂന്ന് വാതിലുകളിൽ കൂടി മാത്രം പൂർണ്ണദർശനം സാധ്യമാകുന്ന 18 അടി നീളമുള്ള അനന്തശയനം അത്യപൂർവ്വമായ പ്രതിഷ്ഠയാണ്. നേപ്പാളിലെ ഗന്ധകി നദിയിൽ നിന്നും കൊണ്ടുവന്ന പന്ത്രണ്ടായിരത്തി എട്ട് സാളഗ്രാമങ്ങൾ കൊണ്ട് വിഗ്രഹത്തിന്റെ അടിത്തറ നിർമ്മിച്ചിരിക്കുന്നു. വിഗ്രഹം പൂർണ്ണമായി ശിലാ നിർമ്മിതമല്ല. കടുശർക്കര എന്ന അത്യപൂർവ്വ ആയുർവേദ ഔഷധക്കൂട്ട് ഉപയോഗിച്ചാണ് മൂലവിഗ്രഹം നിർമ്മിച്ചിരിക്കുന്നത്.