പൊൻ കതിരായ് പൊങ്കൽ

ദ്രാവിഡ വിഭാഗക്കാരുടെ വിളവെടുപ്പുത്സവമാണ് പൊങ്കൽ. തങ്ങൾക്ക് ലഭിച്ച വിളവിനും സമൃദ്ധിക്കും കർഷകർ പ്രകൃതിയോട് നന്ദി പറയുന്ന ദിവസങ്ങളാണ് പൊങ്കൽ ആഘോഷങ്ങൾ. ജനുവരി 18 മുതൽ 21 വരെയാണ് ഇത്തവണത്തെ പൊങ്കൽ. ഇത് സമൃദ്ധിയുടെ കാഹളം കൂടിയാണ്.

- (തയ്യാറാക്കിയത് പി. വരദകുമാരിയമ്മ)

തമിഴ്നാടിന്റെ ജീവിതത്തേയും അവരുടെ ജീവിതരീതികളേയും സംസ്കാരത്തേയും ഒരുമിച്ച് ചേർക്കുന്ന ആഘോഷമാണ് പൊങ്കൽ. ആചാരങ്ങളുടേയും അനുഷ്ഠാനങ്ങളുടേയും കാര്യത്തിൽ മറ്റ് സംസ്ഥാനങ്ങളേക്കാളും ഒരുപടി മുന്നിലാണ് എപ്പോഴും തമിഴ്നാട്. ദ്രാവിഡ വിഭാഗക്കാരുടെ വിളവെടുപ്പുത്സവമാണ് പൊങ്കൽ. തങ്ങൾക്ക് ലഭിച്ച വിളവിനും സമൃദ്ധിക്കും കർഷകർ നന്ദി പറയുന്ന ദിവസങ്ങളാണ് പൊങ്കൽ ആഘോഷങ്ങൾ. ജാതിമതവ്യത്യാസമൊന്നുമില്ലാതെയാണ് പൊങ്കൽ തമിഴകം ഒന്നാകെ ആഘോഷിക്കുന്നത്. മാർകഴി മാസത്തിലെ അവസാന ദിനത്തിൽ തുടങ്ങി തൈമാസം മൂന്നു വരെയാണ് പൊങ്കൽ ആഘോഷം നീളുന്നത്.

പല സംസ്ഥാനങ്ങൾ പല പേരുകൾ

പൊങ്കൽ ആഘോഷങ്ങൾ എല്ലാ സംസ്ഥാനങ്ങളിലുമുണ്ടെങ്കിലും വെവ്വേറെ പേരിലാണ് അറിയ പ്പെടുന്നത്. ആന്ധ്രാപ്രദേശിൽ മകരസംക്രാന്തി എന്നും ബീഹാറിൽ ബിഹു എന്നും രാജസ്ഥാനിലും ഗുജറാത്തിലും ഉത്തരായനം എന്നും പഞ്ചാബിലും ഹരിയാനയിലും മാഘി എന്നും ഇതറിയപ്പെടുന്നു.

സൂര്യന് നന്ദി പറയുന്ന ഭോഗി പൊങ്കൽ