జీవనగమనం 'అభినమనం'

జాంబవతీ శ్రీకృష్ణుల కుమారుడైన సాంబుడు నారదమహర్షి శాపం వలన కుష్ఠురోగపీడితుడవుతాడు

- - శ్రీమతి గంగవరం శ్రీదేవి

జాంబవతీ శ్రీకృష్ణుల కుమారుడైన సాంబుడు నారదమహర్షి శాపం వలన కుష్ఠురోగపీడితుడవుతాడు. శాపపరిహారం కోసం సూర్యభగవానుడిని ఆరాధించమని శ్రీకృష్ణ భగవానుడు చెప్పగా సాంబుడు తదేక నిష్ఠతో ప్రగాఢ తపస్సు ఆచరించాడు. వేదాలలోని సమస్త సౌరవిజ్ఞానాన్ని, సౌరమంత్రశక్తి విశేషాలను, సూర్యభగవానుడి మహత్వాన్ని తెలుపుతూ 50 శ్లోకాలతో 'సాంబ పంచాశిక' రచించాడు. ఈ సందర్భంలో సూర్యానుగ్రహంతో అతడి ఒడిలో భూర్జపత్రాలపై లిఖించబడ్డ 'ద్వాదశార్యాసూర్యస్తుతి'గా  చెప్పబడే 12 శ్లోకాలు పడ్డాయి. ఇవి అత్యంత మహిమాన్వితాలు, అద్భుత ఆరోగ్యప్రదాయకాలుగా ప్రస్తుతించబడుతున్నాయి.

సంకల్పేచ్ఛాద్యఖిల కరణప్రాణవాణ్యో వరేణ్యాః

సంపన్నా మే త్వదభినమనాజ్జన్మ చేదం శరణ్యమ్ |

మన్యే చాస్తం జిగమిషు శనైః పుణ్యపాపద్వయం వా

భక్తి శ్రద్ధే తవ చరణయోరన్యథా నో భవేతామ్ ॥

(సాంబ పంచాశిక - 33) 

"హే సూర్య భగవాన్! నా సంకల్పాలు, కామనలు, నా ఇంద్రియ వ్యాపారములు, ప్రాణములు, వాక్కులు మొదలైనవన్నీ నిన్ను స్తుతిస్తూ నీకు చేసే అభినమనం వలన గొప్పవి అయిపోయాయి. ఈ జన్మ కూడా శరణ్యమవుతుంది.రక్షణను పొందుతుంది. ఇతరులకు సైతం రక్షణ ఇవ్వగల స్థితి వస్తుంది. పాపపుణ్యాలు రెండూ అస్తమించిపోతున్నాయి.నీకు 'అభినమనం' చేయడం వలన నీ అనుగ్రహంతో చిత్తశుద్ధి, వైరాగ్యం, వివేకం కలిగి కర్మక్షయం జరుగుతుంది. భక్తిశ్రద్ధలు పెరుగుతాయి.”