వీళ్ళ విలువ భగవంతుడికే తెలుస్తుంది!

ఇంజినీరింగ్ చదివిన కొడుకును వెంటబెట్టుకొని ఓ తల్లి ఈమధ్య మఠానికి వచ్చింది.

- -స్వామి శితికంఠానంద

ఇంజినీరింగ్ చదివిన కొడుకును వెంటబెట్టుకొని ఓ తల్లి ఈమధ్య మఠానికి వచ్చింది. ఆమె సమస్య ఏమిటంటే ఆ పిల్లవాడు ఇంజినీరింగ్ పూర్తిచేశాడు గానీ, ఏ ఉద్యోగమూ చేయటం లేదు. ఎప్పుడూ ఇంట్లోనే ఫోన్ చూసుకుంటూ ఉంటాడు. ఎవరితోనూ మాట్లాడడు. స్నేహితులు ఎవరూ లేరు. తన వయసు వాళ్ళతో కాక, చిన్న పిల్లలతో మాట్లాడటానికి, వారితో ఉండటానికి ఎక్కువ ఇష్టపడతాడు. 'మా అబ్బాయికి స్ఫూర్తినిచ్చి ఉద్యోగం చేసేటట్లు మీరేమన్నా చేయండి' అని ఆమె విన్నపం.

కొద్దిసేపు ఆ అబ్బాయితో మాట్లాడిన తరువాత తెలిసిందేమంటే, అతడికి పెద్ద కోర్కెలు ఏమీ లేవు.తెలివైనవాడు, బాగానే చదివాడు. తన సబ్జెక్టులో కూడా మంచి పట్టు ఉంది. కానీ, ఏ కంపెనీలోనూ మిగతావారితో కలిసి పనిచేయలేడు. ఆ యువకుడు చాలా సున్నిత మనస్కుడు, పైగా మితభాషి. ఎవరినీ బాధపెట్టని స్వభావం కలవాడు, ఒక మనిషిగా ఉత్తముడు. కానీ తన స్వభావంలో, తన వ్యక్తిత్వంలో ఉన్న చాలా లక్షణాలను చంపుకుంటే కానీ నేటి ప్రైవేట్ రంగంలోని ఉపాధులలో ఇమడలేని పరిస్థితి.తన మనస్తత్వానికి నేటి మనుషుల స్వభావం, పని సంస్కృతి సరిపోవటం లేదు. అక్కడ తనకు ఇష్టం లేకపోయినా కొన్ని చేయాలి. నలుగురితో నారాయణ అనాలి. ఇవేవీ ఆ అబ్బాయికి ఇష్టంలేదు. అందుకే తనతో తాను ఉండటానికి ఇష్టపడుతున్నాడు. తల్లితండ్రులు కూడా తనను అర్థం చేసుకోరనీ, సమాజానికి భయపడి తనను బలవంతంగానైనా ఉద్యోగంలోకి పంపించే ప్రయత్నం చేస్తారనీ, వారి ముందు కూడా మనసు విప్పటం ఆ యువకుడికి ఇష్టంలేదు.