మీరు సహకరిస్తేనే...

ప్రతిష్టాత్మకమైన 'పద్మభూషణ్’ పురస్కారానికి సామాజిక ఏడాది ఇన్ఫోసిస్ ఫౌండేషన్ సేవావిభాగంలో వ్యవస్థాపకురాలు, ప్రముఖ రచయిత్రి శ్రీమతి సుధామూర్తి గారిని ఎంపిక చేయటం విశేషం.

- బి.సైదులు

ప్రతిష్టాత్మకమైన 'పద్మభూషణ్’ పురస్కారానికి సామాజిక ఏడాది ఇన్ఫోసిస్ ఫౌండేషన్ సేవావిభాగంలో వ్యవస్థాపకురాలు, ప్రముఖ రచయిత్రి శ్రీమతి సుధామూర్తి గారిని ఎంపిక చేయటం విశేషం. ఆ మానవతామూర్తికి 'పద్మభూషణ్' ప్రకటించగానే ఆత్మీయులు, కుటుంబసభ్యులు మంగళహారతి ఇస్తూ, ఆశీర్వచనాలు పలికే దృశ్యాలు సామాజిక మాధ్యమాల్లో విస్తృతంగా వ్యాపించాయి. ఆమె స్ఫూర్తిదాయకమైన వ్యక్తిగా, వక్తగా జగమెరిగిన మగువ.

ఒకసారి సుధామూర్తిగారు ఓ కళాశాలకు ముఖ్యఅతిథిగా హాజరయ్యారు. చైతన్యవంతమైన ఆమె ప్రసంగం తరువాత ప్రశ్నోత్తర కార్యక్రమం ఏర్పాటు చేశారు. అందులో భాగంగా ఆ మాననిని ఓ అభిమాని “మేడమ్! ఓ వ్యక్తి విజయంలో కుటుంబ సభ్యుల ప్రోత్సాహం, జీవితభాగస్వామి సహకారం ఎంతవరకు అవసరం?" అని ప్రశ్నించారు. అప్పుడు సుధామూర్తిగారు తన సహజమైన నిర్మల మందహాసంతో "సన్నిహితుల సహకారం లేకపోతే ఎవరూ ముందుకు వెళ్ళలేరు. అర్థం చేసుకొని ప్రోత్సహించే కుటుంబ సభ్యులు ఉన్నప్పుడే సులువుగా మన స్వప్నాల్ని సాకారం చేసుకోగలుగుతాం. ఉదాహరణకు మా విషయమే తీసుకోండి! నారాయణమూర్తి గారి జీవితకాల కల ఇన్ఫోసిస్! ముప్పై ఏళ్ళ పాటు తపస్సులా ఆ సాఫ్ట్వేర్ సంస్థ కోసం శ్రమించారు. వ్యక్తిగత జీవితాన్ని, సౌకర్యాల్ని కూడా పట్టించుకోలేదు. ఇన్ఫోసిస్ ప్రారంభ దశలో దాదాపు నెలలో ఇరవై రోజులు ప్రయాణాలే చేస్తుండేవారు. మిత్రురాలిగా, జీవితభాగస్వామిగా ఆయన దీక్షను, పట్టుదలను అర్థం చేసుకోవాల్సిన బాధ్యత నాదే కదా! మా అదృష్టవశాత్తూ మా వైపు వారు, వాళ్ళ వైపు వారు కూడా మాకు ఎంతో అండగా నిలబడ్డారు. ఇన్ఫోసిస్ ను ప్రారంభించిన తొలిరోజుల్లో మేమిద్దరం ఎక్కువ సమయం కార్యాలయంలోనే గడిపేవాళ్ళం. మా పిల్లల్ని మా సోదరీమణులు, మా అత్తగారే చూసుకున్నారు. ఇక నేను ఇన్ఫోసిస్ ఫౌండేషన్ కార్యకలాపాల్లో భాగంగా నెలల తరబడి వివిధ ప్రాంతాల్లో పర్యటించాల్సి వస్తుంది. సేవాకార్యక్రమాల్లో భాగంగా రేయనకా, పగలనకా ఇల్లు వదిలి బయట ఉండాల్సి వస్తుంది. అయినా ఒక్కరోజు కూడా నారాయణమూర్తి భర్తగా నాపై తన ఆధిపత్యాన్ని ప్రదర్శించలేదు. పైగా నేను సేవారంగంలో ముందుకు వెళ్ళేందుకు ఎన్నో సలహాలు, సూచనలు ఇచ్చి సహకరించారు, ఇప్పటికీ సహకరిస్తున్నారు” అని వివరించారు.