കാത്തിരിക്കുന്നു ബെൻസേമ

ബെൻസേമ നിഴലുകളിൽ നിന്ന് പുറത്തു കടന്നിരിക്കുന്നു. മെസ്സിയ്ക്കും ക്രിസ്റ്റ്യാനോയ്ക്കും ഒപ്പമോ മുകളിലോ ആണ് തന്റെ പ്രതിഭയെന്ന് വെളിപ്പെടുത്താനുള്ള സമയം ആഗതമായിരിക്കുന്നു. ബെൻസേമ ഒരുങ്ങിത്തന്നെയാണ് ഇത്തവണ ഖത്തറിലേക്ക് എത്തുന്നത്

- എം.പി. സുരേന്ദ്രൻ

ഇതൊരു യുഗപ്പകർച്ചയാണ്. കരിം ബെൻസേമ നിഴലുകളിൽ നിന്ന് പുറത്തു കടന്നിരിക്കുന്നു. പെലെയും പ്ലാറ്റീനിയും സീക്കോയും വാൻബാസ്റ്റനുമെല്ലാം കളിനിർത്തിയ പ്രായത്തിൽ ബെൻസേമ ഫുട്ബോളിന്റെ ലോകസിംഹാസനത്തിലേക്ക് യാത്ര ചെയ്യുകയാണ്.

2007-ൽ കക്ക ലോകത്തിന്റെ നെറുകയിൽ എത്തിയശേഷം നാം കണ്ടത് ഫുട്ബോളിലെ യുഗപരിവർത്തനമാണ്. ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡിലേക്കും ലിയോ മെസ്സി ബാഴ്സലോണയുടെ ഒന്നാം ടീമിലേക്കും കടന്നു വന്നതിനുശേഷം ലോകം അവർക്കു ചുറ്റും വലംവെയ്ക്കുകയായിരുന്നു. റൊണാൾഡോയും മെസ്സിയും കത്തിനിൽക്കുന്ന കാലത്താണ് റിക്കാർഡോ കക്ക ബാലൻദ്യോറും ഫിഫാ കിരീടവും നേടുന്നത്. പ്രതിഭയുടെ അന്യാദൃശമായ തിളക്കംകൊണ്ടാണ് കക്ക ആ നേട്ടത്തിലേക്ക് കയറിവന്നത്.

എന്നാൽ 2008 മുതൽ ഫുട്ബോളിലെ വ്യക്തി ഗത കിരീടങ്ങൾ മുഴുവനും റൊണാൾഡോയും മെസ്സിയും പങ്കുവെച്ചു. അത്രമാത്രം ആധികാരികമായിരുന്നു അവരുടെ പ്രകടനങ്ങൾ. അപ്പോഴേക്കും ഫുട്ബോൾ രംഗത്തെ യുവത്വം മെസ്സിക്കും ക്രിസ്റ്റ്യാനോക്കും പിന്നിൽ രണ്ടുലോകങ്ങളായി വേർപിരിഞ്ഞു. ഓരോ ദിവസവും പുതിയ സ്ഥിതി വിവരക്കണക്കുകൾ സൃഷ്ടിച്ചു കൊണ്ട് ആ ചേരികൾ ആവേശം സൃഷ്ടിച്ചു. 2009-ൽ ക്രിസ്റ്റ്യാനോ റയൽ മഡ്രിഡിൽ വന്നതോടെ റയലും ബാഴ്സലോണയും, ക്രിസ്റ്റ്യാനോയും മെസ്സിയുമായുള്ള യുദ്ധമുഖങ്ങൾ തുറന്നു. റൊണാൾഡോ വന്ന വർഷംതന്നെ ബെൻസേമയും ലിയോണിൽ നിന്ന് മാഡ്രിഡ് ക്ലബ്ബിലേക്ക് എത്തിച്ചേർന്നിരുന്നു. ക്രിസ്റ്റ്യാനോ മാസ്റ്ററിൽ 2007-ലും 2008-ലും തരംഗങ്ങൾ സൃഷ്ടിച്ചു കൊണ്ടിരിക്കേ ബെൻസേമ ലിയോണിൽ രണ്ട് സീസണുകളിലായി 54 ഗോളുകൾ നേടി ശ്രദ്ധപിടിച്ചു പറ്റിയിരുന്നു. പക്ഷേ, മാധ്യമങ്ങൾ ക്രിസ്റ്റ്യാനോയുടെയും മെസ്സിയുടെയും വീരചരിതങ്ങൾക്കു പിന്നാലെയായിരുന്നു. മികച്ച മിഡ്ഫീൽഡർമാരുടെയും ഗോൾവേട്ടക്കാരുടെയും വിധിയും ഇതായിരുന്നു.

2018 ബെൻസേമയുടെയും ക്രിസ്റ്റ്യാനോയുടെയും ജീവിതത്തിലെ വഴിത്തിരിവായി മാറി. ക്രിസ്റ്റ്യാനോ യുവന്റസിലേക്ക് മാറി. ബെൻസേമ നിഴലുകളിൽ നിന്ന് മോചിതനായി. അതേ വർഷം ലോകഫുട്ബോളർ പദവി അതുല്യനായ ലൂക്കാ മോഡ്രിച്ചിനു സമർപ്പിച്ചു. കാലം നിരന്തരം ഒഴുകിക്കൊണ്ടിരിക്കേ മെസ്സിയും ക്രിസ്റ്റ്യാനോയും മികവിന്റെ കുന്നുകൾ ഇറങ്ങിത്തുടങ്ങിയിരുന്നു. പ്രായം അതിന്റെ ആദ്യത്തെ അടയാളങ്ങൾ കാണിച്ചു കൊടുത്തത് ക്രിസ്റ്റ്യാനോക്കാണ്.