കൊച്ചിയിലെ കൊമ്പൻമാർ

 കളിയിൽ പ്രൊഫഷണൽ സമീപനം കൊണ്ടു വന്നതുകൊണ്ടാണ് കഴിഞ്ഞ സീസണിൽ ബ്ലാസ്റ്റേഴ്സ് റണ്ണറപ്പ് ആയത്. അതിന്റെ തുടർച്ചയാണ് ഇനി വേണ്ടത്

- അനീഷ് പി.നായർ

കഴിഞ്ഞ സീസണിലെ മികച്ച പ്രകടനം, തിങ്ങിനിറയുന്ന കാണികളുള്ള കൊച്ചിയിലേക്കുള്ള തിരിച്ചുവരവ്. ഇന്ത്യൻ സൂപ്പർ ലീഗ് ഫുട്ബോളി ന്റെ എട്ടാം സീസണിൽ കേരള ത്തിന്റെ കൊമ്പൻമാരിൽനിന്ന് തകർപ്പൻ പ്രകടനത്തിൽ കുറഞ്ഞതൊന്നും ആരാധകർ പ്രതീക്ഷിക്കുന്നില്ല.

കഴിഞ്ഞ സീസണിൽ റണ്ണറപ്പായ ക്ലബ്ബ് കോർ ടീമിനെ നിലനിർത്തിയും പരിശീലകൻ ഇവാൻ വുകോമാനോവിച്ചിൽ വീണ്ടും പ്രതീക്ഷയർപ്പിച്ചുമാണ് ഇത്തവണ കളിക്കാൻ ഇറങ്ങുന്നത്. രണ്ടും ബ്ലാസ്റ്റേഴ്സിന് പതിവില്ലാത്ത കാര്യമാണ്.

ഇന്ത്യൻ സൂപ്പർ ലീഗും മറ്റ് പത്ത് ക്ലബ്ബുകളും കൂടുതൽ പ്രൊഫഷണലിസത്തിലേക്ക് എത്തുന്ന സീസണിൽ ഏറ്റവും മികച്ച പ്രകടനം പുറത്തെടുത്താൽ മാത്രമേ മുന്നോട്ടുപോകാൻ കഴിയൂ എന്ന തിരിച്ചറിവ് ബ്ലാസ്റ്റേഴ്സിനുണ്ട്.

മാറുന്ന ബ്ലാസ്റ്റേഴ്സ്

കളിക്കളത്തിനകത്ത് മാത്രമല്ല പുറത്തും മുഖം മാറുന്ന ബ്ലാസ്റ്റേഴ്സിനെ കാണാം. സ്പോർട്ടിങ് ഡയറക്ടറായി ലിത്വാനിയക്കാരൻ കരോളിസ് സ്കിൻകിസ് വന്നതു മുതൽ ക്ലബ്ബ് പ്രൊഫഷണലിസത്തിലേക്ക് മാറാൻ ശ്രമിക്കുകയാണ്. അതിന്റെ ഗുണഫലമാണ് കഴിഞ്ഞ സീസണിലെ മികച്ച പ്രകടനം.

ഇന്ത്യൻ കളിക്കാരേയും വിദേശകളിക്കാരേയും എടുക്കു ന്നതിലും മികച്ച കളിക്കാരെ നില നിർത്തുന്നതിലും പ്രൊഫഷണൽ രീതി ബ്ലാസ്റ്റേഴ്സ് മാനേജ്മെന്റിന് കൈവന്നിട്ടുണ്ട്‌. അതാണ്‌ യുവകളിക്കാരുമായുള്ള ദീര്‍ഘകാല കരാറുകളും അഡ്രിയന്‍ ലൂണ, മാര്‍ക്കോ ലെസ്‌കോവിച്ച്‌ എന്നിവരെ നിലനിര്‍ത്തുന്നതിലും കാണാന്‍ കഴിയുന്നത്‌. ഇന്ത്യന്‍ കളിക്കാരെ എടുക്കുന്നതില്‍ യുവത്വത്തിനും കളിമികവിനും കൂടുതല്‍ പ്രധാന്യം നല്‍കുന്നു. വമ്പന്‍ പേരുകള്‍ക്ക്‌ പിന്നാലെ ക്ലബ്ബ്‌ പോകുന്നില്ല.

വിദേശകളിക്കാരെ കൊണ്ടുവരുന്നതിലും പഴയരീതി മാറിയിട്ടുണ്ട്‌. ഗ്രീക്ക്‌ കളിക്കാരെ മുന്നേറ്റത്തിലേക്ക്‌ കൊണ്ടുവന്നതും യുക്രൈന്‍ ലീഗ്‌ നിര്‍ത്തിവെച്ചത്‌ മുതലാക്കി മികച്ച മധ്യനിര താരത്തെ കൊണ്ടുവന്നതുമൊക്കെ സ്‌കിന്‍കിസിന്റെ പ്രൊഫഷണലിസത്തിന്റെ ഭാഗമാണ്‌. കളിക്കാരെ കൊണ്ടുവരുന്നതില്‍ പുലര്‍ത്തുന്ന അച്ചടക്കവും സാമുഹിക മാധ്യമങ്ങളിലെ ഇടപെടലും ആരാധകരെ വിശ്വാസത്തിലെടുത്തുള്ള സമീപനവും ബ്ലാസ്റസ്റേഴ്‌സിന്‌ കൂടുതല്‍ വളരാനുള്ള മണ്ണൊരുക്കുന്നു.