വെൽക്കം റ്റു നോമാൻസ്ലാൻഡ്

മൈതാനങ്ങളിലെ കൂളിങ് ടെക്നോളജി കളിക്കാർക്ക് അവരുടെ ലീഗുകളിൽ കളിക്കുന്നതുപോലെയുള്ള 'ഫീൽ ഉളവാക്കും. അതെ ഖത്തറിലേത് ഒരു തുറന്ന കളിക്കളമാണ്. ആർക്കും പ്രത്യേക ആനുകൂല്യം ഇല്ല. ഇവിടെ ആർക്കും ജയിക്കാം

- എം.പി. സുരേന്ദ്രൻ [e-mail]

ഇതിനുമുൻപൊന്നും ഇത്രയും ചെറിയൊരു രാജ്യത്ത് ലോകകപ്പ് ഫുട്ബോൾ നടന്നിട്ടില്ല. ആഫ്രിക്കയ്ക്കും തെക്കേയമേരിക്കയ്ക്കും യൂറോപ്പിനും ശേഷം ഏഷ്യയുടെ ഭാഗമായ അറബ് ലോകത്തിന്റെ മടിയിലേക്ക് ഫുട്ബോൾ ടൂർണമെന്റ് കടന്നുവരികയാണ്. പക്ഷേ, ലോകരാഷ്ട്രങ്ങളെ അസൂയപ്പെടുത്തുംവിധം ഖത്തർ, ഈ ടൂർണമെന്റിന്റെ മുഖം വർണശബളമാക്കുകയാണ്.

പാലക്കാട്, മലപ്പുറം, കോഴിക്കോട് ജില്ലകൾ ചേർന്നാൽ ഖത്തറിന്റെ വിസ്തീർണമായി. എന്നാൽ കോഴിക്കോട് ജില്ലയിലെ ജനസംഖ്യയേയുള്ളൂ.  ഇതാണ് ഏറ്റവും കൂടുതൽ മലയാളികൾ നേരിട്ടു കാണാനിരിക്കുന്ന ലോകകപ്പിന്റെ ഒരു നാട്ടുചിത്രം. എന്നാൽ ഈ ടൂർണമെന്റ് ഖത്തർ ഒരുക്കുന്നത് ലോകത്തിനു വേണ്ടിയാണ്. കളിക്കാർക്കും കാണികൾക്കുമുള്ള ഒരു വെൽനസ് ടൂർണമെന്റാണ് അവർ ലക്ഷ്യമിടുന്നത്.

ന്യൂട്രൽ ഖത്തർ

ഖത്തറിലെ ഓരോ സ്റ്റേഡിയവും 32 ടീമുകൾക്കും അനുയോജ്യമെന്ന് തോന്നും വിധമാണ് ഒരുക്കിയത്. അതുകൊണ്ടുതന്നെ ഇതൊരു ന്യൂട്രൽ ടൂർണമെന്റാണ്. ഖത്തർ ഒരുക്കുന്ന കൂളിങ് ടെക്നോളജി താരങ്ങൾക്ക് അവരുടെ ലീഗുകളിൽ കളിക്കുന്നതു പോലെയുള്ള 'ഫീൽ ഉളവാക്കും. എഴുത്തുകാരും വിശകലന വിദഗ്ധരും ഇതൊരു തുറന്ന കളിക്കളമായിരിക്കുമെന്ന് ദീർഘദർശനം ചെയ്യുന്നു. മറ്റുചിലർ ഇതൊരു 'നോമാൻസ് ലാൻഡ്' ആയിരിക്കുമെന്ന് വിശേഷിപ്പിക്കുന്നു. അതിന്റെയർഥം മൈതാനത്തിന്റെ ആനുകൂല്യം എല്ലാവർക്കും ഒരുപോലെയായിരിക്കും എന്നുതന്നെയാണ്. ഖത്തറിനു വേണ്ടി കൂടുതൽ കൈയടികൾ ഉയരുമെന്നതൊഴിച്ചാൽ കാണികളും ഇത്തവണ ന്യൂട്രൽ തന്നെയായിരിക്കും. ഏറ്റവും മികച്ച മത്സരങ്ങൾക്കു വേണ്ടി അവർ കാത്തിരിക്കുന്നു. മികച്ച ടീമുകൾക്ക് കൊടിയുടെയും അതിർത്തിയുടെയും അതിരുകൾ കടന്ന് ഖത്തറിൽ പിന്തുണ ലഭിക്കും. ഏറ്റവും മികച്ച അതിജീവനശേഷിയുള്ള ടീമിനു മാത്രമേ ആറ് കളികൾക്കു ശേഷം ഏഴാമത്തെ കളിയായ ഫൈനലിൽ പ്രവേശിക്കാൻ കഴിയുകയുള്ളൂ.