രണ്ടാംഭാവം

അർജന്റൈൻ ഫുട്ബോളിന്റെ തനതുരസങ്ങളാണ് ഖത്തറിലും മെസ്സി കാഴ്ചവെച്ചത്. തോറ്റുതുടങ്ങി, വിജയങ്ങൾ ഓരോന്നായി വെട്ടിപ്പിടിച്ച് മെസ്സിയും സംഘവും കുതിച്ചുകയറിയത് കിരീടത്തിലേക്കാണ്

- ആർ.ഗിരീഷ്കുമാർ

അന്തിമഫലം എന്തുമാകട്ടെ, നിങ്ങളിൽനിന്ന് മറ്റൊരാൾക്കും സ്വന്തമാക്കാനാകാത്ത ചിലതുണ്ട്. അതുപറയാതെ വയ്യ. യഥാർഥത്തിൽ അർജന്റീനയിലെ ഓരോ മനുഷ്യരുടെയും ഉള്ളിന്റെയുള്ളിലേക്ക് നിങ്ങൾ ആഴ്ന്നിറങ്ങിയിരിക്കുന്നു. നിങ്ങളുടെ പേരെഴുതിയ ജേഴ്സി സ്വന്തമാക്കാത്ത ഒരു കുട്ടിപോലും ഈ രാജ്യത്തില്ലെന്നത് ഇന്ന് അതിശയോക്തിയല്ല. ഓരോരുത്തരുടെയും ജീവിതത്തിൽ നിങ്ങളുണ്ട്. അത് ഏതു ലോകകപ്പ് നേടുന്നതിനും അപ്പുറമാണ്. അതൊരാൾക്കും നിങ്ങളിൽ നിന്ന് തട്ടിയെടുക്കാനുമാകില്ല. - സെമി ഫൈനൽ വിജയത്തിനുശേഷം മാധ്യമങ്ങളെ കാണാനെത്തിയ ലയണൽ മെസ്സിയോട് അർജന്റൈൻ പത്രക്കാരി സോഫി മാർട്ടിനെസിന് ഒന്നും ചോദിക്കാനുണ്ടായിരുന്നില്ല. തന്റെ ഹൃദയത്തിലെന്താണ് മെസ്സി ' എന്ന് ഇടറുന്ന വാക്കുകളിൽ അവർ പറഞ്ഞൊപ്പിച്ചു. അർജന്റീനക്കാരിയായ ഒരമ്മയുടെ വാത്സല്യത്തോടെ ഒരു കൂട്ടുകാരിയുടെ സ്നേഹവായപോടെ, ഒരു ആരാധികയുടെ ഭ്രാന്തമായ ഉന്മാദത്തോടെ. നിറഞ്ഞ ഹൃദയവുമായി സോഫിയുടെ വാക്കുകൾ മെസ്സി കേട്ടിരുന്നു. ഉള്ളിൽത്തട്ടിയ വാക്കുകൾക്ക് നിറഞ്ഞ ചിരികൊണ്ടൊരു സ്നേഹാഭിവാദ്യം തിരികെ നൽകി. സോഫിയുടെ വാക്കുകൾ പിന്നീട് സാമൂഹികമാധ്യമങ്ങൾ തരംഗമാക്കി. അതിനുവന്ന ആയിരക്കണക്കിനു കമന്റുകൾ മെസ്സിയോടുള്ള സ്നേഹപ്രകടനങ്ങളായി. അവയോരോന്നും സോഫിയെ ഓർമിപ്പിച്ചു.

“നിങ്ങൾ പറഞ്ഞ വാക്കുകൾ എത്രയോ ശരി. പക്ഷേ, അതൊന്നും അർജന്റീനയ്ക്കു മാത്രമായി ചുരുക്കരുത്. മെസ്സി ഞങ്ങളുടേതും കൂടിയാണ്. ആ പറഞ്ഞവരുടെ കൂട്ടത്തിൽ എട്ടുവർഷം മുമ്പ് മെസ്സിയിൽ നിന്ന് ലോകകിരീടം തട്ടിയെടുത്ത ജർമനിയിൽ നിന്നുള്ള ആരാധകരുണ്ടായിരുന്നു. ഖത്തറിലെ ഫൈനലിൽ മെസ്സിയെ നേരിടുന്ന ഫ്രഞ്ചുകാരുമുണ്ടായിരുന്നു. രണ്ടുവട്ടം കോപ്പ അമേരിക്ക തട്ടിയെടുത്ത് മെസ്സിയെ വിരമിക്കൽ പ്രഖ്യാപനത്തിലേക്കു പോലും തള്ളിയിട്ട ചിലിക്കാരുണ്ടായിരുന്നു. ദേശമോ ഭാഷയോ ഇല്ലാതെ ആരാധകർ ആ പത്താം നമ്പർ  കുപ്പായത്തിൽ സ്നേഹത്തിന്റെ ഇമോജികൾ പതിപ്പിച്ചുകൊണ്ടിരുന്നു.