യൂ ടൺ...

ഇന്ത്യ-ഓസ്ട്രേലിയ പരമ്പരയിലെ രണ്ട് ടെസ്റ്റുകളിലും വിക്കറ്റുവേട്ടക്കാരായത് സ്പിന്നർമാരായിരുന്നു. ആധുനികക്രിക്കറ്റിലേക്ക് സ്പിൻ ബോളിങ്ങിന്റെ മനോഹാരിത വീണ്ടുമെത്തുകയാണോ?

- എബി ടി. എബ്രഹാം

ഈ നൂറ്റാണ്ടിന്റെ രണ്ടാം ദശകത്തിൽ ട്വന്റി- ട്വന്റി ഫ്രാഞ്ചൈസി ക്രിക്കറ്റ് ജനപ്രീതി നേടിയതോടെ, ബൗളർമാർ എന്നത് ബാറ്റർമാരുടെ തല്ലുവാങ്ങാൻ മാത്രം ഉതകുന്ന വർഗ്ഗം എന്നായിരുന്നു ഒരു നിഗമനം, പ്രത്യേകിച്ചും സ്പിൻ ബൗളർമാർ. എന്നാൽ ട്വന്റി ട്വന്റി ക്രിക്കറ്റിന്റെ ജനപ്രീതി വർധിക്കുന്നതോടെ എല്ലാ രാജ്യങ്ങളിലും സ്പിന്നിന് മുൻപില്ലാത്ത സ്വീകാര്യത ഏറുന്നതായി കാണുന്നു. ട്വന്റി ട്വന്റിയിൽ മാത്രം ഒതുങ്ങുന്നതല്ല സ്പിന്നിന് ലഭിക്കുന്ന ഈ ഉണർവ്. ടെസ്റ്റ് ക്രിക്കറ്റിൽ, പ്രത്യേകിച്ചും ഇന്ത്യൻ ഉപഭൂഖണ്ഡത്തിൽ കളിക്കുന്ന ടെസ്റ്റ് മത്സരങ്ങളിൽ സ്പിന്നർമാർ കളിയുടെ ഗതി നിർണയിക്കുന്ന തരത്തിൽ സ്പിൻ ബൗളിങ്ങിന് പ്രാമുഖ്യം ഏറുന്നു. ടെസ്റ്റ് ക്രിക്കറ്റിൽ ഏറ്റവുമധികം വിക്കറ്റുകൾ വീഴ്ത്തിയ ആദ്യ പത്ത് ബൗളർമാരുടെ എണ്ണമെടുത്താൽ അതിൽ അഞ്ചും സ്പിന്നർമാരാണ്. ഒന്നും രണ്ടും സ്ഥാനങ്ങളിൽ മുത്തയ്യ മുരളീധരനും ഷെയ്ൻ വോണും. ഈ പട്ടികയിൽ പിന്നെയുള്ളത് അനിൽ കുംബ്ലെയും നേഥൻ ലയണും ആർ. അശ്വിനും. സ്പി ന്നിങ് ഓൾറൗണ്ടറായ രവീന്ദ്ര ജഡേജ പേസ് ഓൾറൗണ്ടറായ കപിൽ ദേവിന്റെ രണ്ടു റെക്കോർഡുകളാണ് ഇന്ത്യ-ഓസ്ട്രേലിയ ടെസ്റ്റ് പരമ്പരയിൽ തിരുത്തിക്കുറിച്ചത്. ഒരു ടെസ്റ്റ് മത്സരത്തിൽ 50 റൺസും അഞ്ച് വിക്കറ്റും എന്ന നേട്ടം അഞ്ച് തവണ കരസ്ഥമാക്കി കപിൽ ദേവിന്റെ റെക്കോർഡ് മറികടന്നു. മറ്റൊന്ന്, ഏറ്റവും വേഗത്തിൽ 250 വിക്കറ്റുകളും 2500 റൺസും നേടുന്ന ഇന്ത്യൻ ഓൾറൗണ്ടർ എന്ന കപിൽ ദേവിന്റെ മികവും രവീന്ദ്ര ജഡേജ മറികടന്നു. ഇംഗ്ലണ്ടിന്റെ ഇയാൻ ബോത്തമിന് പിന്നിൽ രണ്ടാം നേട്ടത്തോടെ സ്ഥാനവും ഈ ജഡേജ സ്വന്തമാക്കി. മികവിന്റെ യഥാർത്ഥ പരീക്ഷണമായ "ടെസ്റ്റിലെ' ഈ സ്പിൻ വസന്തം പുതിയ കാലത്തിന്റെ വിളംബരമാണോ...?

സ്പിൻ വീര്യം