സ്ത്രീയെ ഭരിക്കുന്ന തോന്നലുകൾ

സമൂഹം അടിച്ചേല്പിക്കുന്ന ചില മുൻവിധികളും കാഴ്ചപ്പാടുകളും സ്ത്രീകളിൽ ഉണ്ടാക്കുന്ന തകർച്ചയുടെ ആഴം വളരെ വലുതാണ് . അതിലെ അപകടം തിരിച്ചറിയാൻ വൈകാതിരിക്കുക...

- ആർ. രാജശ്രീ

അയാൾ നിങ്ങളെ എന്തു കൊണ്ടാണ് വിവാഹം ചെയ്തത്?  അല്ലെങ്കിൽ “നിങ്ങൾ അയാളെ വിവാഹം ചെയ്തതിനു കാരണമെന്തായിരുന്നു?''

ഉത്തരം നാം കരുതുന്നപോലെ അത്ര എളുപ്പമല്ല. കാരണം ഇത് വിവാഹാലോചനയിൽത്തുടങ്ങുന്ന ഒന്നല്ലാത്തതു തന്നെ. നാം ജനിച്ചതും പേരു നല്കപ്പെട്ടതും വളർച്ചയിലെ ഓരോ ഘട്ടവും താണ്ടിയതും ഇതിനുള്ള ഉത്തരമായാണ്. സംശയമുണ്ടോ?

താൻ അവകാശാധികാരങ്ങളുള്ള ഒരു മനുഷ്യജീവിയാണെന്ന ബോധത്തിനു പകരം കുറവുകളോടെ ജനിച്ച ഒരാളാണെന്ന തോന്നലാണ് സ്ത്രീയെ ഭരിക്കുക. ജനിച്ച വീടുവിട്ട് മറ്റൊരിടത്ത് വേരുറപ്പിക്കാൻ എന്തൊക്കെ അഭ്യാസങ്ങൾ വേണ്ടിവരുമോ അതൊക്കെ പഠിച്ചെടുക്കലാണ് സ്ത്രീയുടെ ജന്മലക്ഷ്യം എന്ന് കുടുംബവും സമൂഹവും ഉറപ്പിക്കും .എന്റെ തലമുറയിൽ അത് പരസ്യമായിത്തന്നെ പറഞ്ഞുറപ്പിച്ചിരുന്നു. ദരിദ്രരും നിസ്സഹായരുമായ പെൺകുട്ടികളെ രക്ഷിക്കുന്ന വീരനായകന്മാരെ നാം ഇപ്പോഴും കാണാറില്ലേ? അത്തരം പെൺകുട്ടികൾ ആജീവനാന്തം രക്ഷകർക്കു വിധേയകളായില്ലെങ്കിൽ എന്താണ് അവരെ കാത്തിരിക്കുന്നത്?

എത്രയോ സിനിമകൾ, കഥകൾ, നോവലുകൾ, നാട്ടുവർത്തമാനങ്ങൾ അത്തരത്തിൽ നാം കേട്ടിട്ടുണ്ട്. എന്തെങ്കിലും കുറവുകളുള്ളവരെ സ്വീകരിക്കാനെത്തുന്ന മഹത്തുക്കളെ നാം എന്നും ആരാധനയോടെയാണ് കാണുക. ആലോചിച്ചു നോക്കൂ, ഏതു തരത്തിലുള്ള കുറവുകളും (അങ്ങനെ പറയാമെങ്കിൽ ) മറ്റുള്ളവരുടെ ദൃഷ്ടിയിലാണ് അങ്ങനെയാവുന്നത്. അവരാണ് അതിനെ കുറവുകളെന്ന് വിളിച്ചത്. നാം അവരുടെ ദൃഷ്ടി കടമെടുക്കുകയായിരുന്നു. നമ്മുടെ കുറവുകൾ മറ്റുള്ളവരുടെ ഔദാര്യത്തിലാണ് പരിഹരിക്കപ്പെടുന്നതെന്നല്ലേ നാം പഠിച്ചത്? അത് നമ്മുടെ വ്യക്തിത്വത്തിന്റെയും ജീവിതത്തിന്റെയും ഭാഗമാണ്, അവയോടു കൂടിയാണ് നാം അംഗീകരിക്കപ്പെടേണ്ടത് എന്ന് ആരെങ്കിലും പറഞ്ഞു തന്നിരുന്നോ? പോട്ടെ, നാം അംഗീകാരം അർഹിക്കുന്നവരാണന്നെങ്കിലും?