കുഞ്ഞുപെണ്ണ് കിണറും കുഴിക്കും

എഴുപത്തഞ്ച് വയസ്സിനുള്ളിൽ നൂറുകണക്കിന് കിണറുകൾ കുഴിച്ച കുഞ്ഞുപെണ്ണിന് പറയാനുണ്ട് കിണറോളം കഥകൾ

- പ്രശാന്ത് കലഞ്ഞൂർ

 ഇവിടെ കിണർ കുഴിക്കുവാണ്. പെണ്ണുങ്ങൾ ഇങ്ങോട്ട് വരരുത്...'' ഈ വാക്കുകൾ കുഞ്ഞു പെണ്ണിന്റെ ഹൃദയത്തിലാണ് പതിച്ചത്. ജീവിതത്തോട് പൊരുതി മുന്നേറുന്നതിനിടയിൽ സ്ത്രീയെന്ന നിലയിൽ തന്നെ അകറ്റി നിർത്തിയ ഇടം തന്നെയാണ് പിന്നീട് കുഞ്ഞുപെണ്ണ് പിടിച്ചെടുത്തത്. എഴുപത്തിയഞ്ചാം വയസ്സിലും എൺപതടി താഴ്ചയുള്ള കിണറുകൾ അനായാസം കുഴിക്കും കുഞ്ഞുപെണ്ണ്. നൂറുകണക്കിന് കിണറുകളാണ് ഇവർ കുഴിച്ചത്.

ഭർത്താവ് തമിഴ് നാട്ടുകാരനായിരുന്നു. മകന് ഒന്നര വയസ്സുള്ളപ്പോൾ അയാൾ ഞങ്ങളെ കളഞ്ഞിട്ട് പോയി. കുഞ്ഞിന്റെ കാര്യം നോക്കണമല്ലോ. കൂടെ അമ്മയും ഉണ്ട്. മൂന്ന് വയറിന്റെ വിശപ്പകറ്റണം. ആരുമില്ലെന്ന് പറഞ്ഞിരുന്നിട്ട് ഒരു കാര്യോം ഇല്ല. ഞാൻ പണിക്കിറങ്ങി...''അന്നു മുതലിങ്ങോട്ട് വിശ്രമം അറിഞ്ഞിട്ടില്ലെന്ന് പറയുന്നു കുഞ്ഞുപെണ്ണ്. 

തുടക്കം വാനംവെട്ടി

മുപ്പത്തിരണ്ടാം വയസ്സിൽ കുഞ്ഞുപെണ്ണ് മൺവെട്ടിയുമെടുത്ത് പുറത്തേക്കിറങ്ങി. വീട് പണിക്കുള്ള വാനം വെട്ടി(കുഴിയെടുത്ത് തുടക്കം. അങ്ങനെ ഒരിക്കൽ ഒരു ജോലിസ്ഥലത്ത് കിണറിന്റെ പണി നടക്കുന്നു. കിണർ കുഴിക്കുന്നത് കാണാൻ അങ്ങോട്ട് ചെന്നതും പെണ്ണുങ്ങൾ അവിടെ നിൽക്കാൻ പാടില്ലെന്ന താക്കീത് ഉയർന്നു. അതേ താക്കീത് കുഞ്ഞുപെണ്ണിനെ കിണറുമായി അടുപ്പിച്ചു. കിണർ സ്വയം കുഴിച്ചേ അടങ്ങൂ എന്ന വാശിയായി. ആ വാശിപ്പുറത്ത് കിണറുപണിയുടെ ഘട്ടങ്ങൾ നിരീക്ഷിച്ച് മനസ്സിലാക്കി. പഠിച്ചറിഞ്ഞ അറിവ് വീട്ടുമുറ്റത്തു തന്നെ പരീക്ഷിക്കാനായിരുന്നു കുഞ്ഞുപെണ്ണിന്റെ തീരുമാനം..